کورونا کے مکمل خاتمے تک پرائمری ومڈل اسکول نہ کھولے جائیں، وزیر صحت سندھ

کراچی: سندھ کی وزیر برائے صحت ڈاکٹر عذرا فضل پیچوہو نے کورونا وائرس کے مکمل خاتمے تک پرائمری اور مڈل اسکول کھولنے کی مخالفت کردی ہے۔

صوبائی وزیرصحت و بہبود آبادی ڈاکٹر عذرا فضل پیچوہو کی جانب سے جاری ایک ویڈیو بیان میں کہا گیا ہے کہ کورونا وائرس کے خدشات اب بھی ملک میں موجود ہیں، جس کے پیش نظر ہمیں احتیاط کرنے کی ضرورت ہے، وباء کے مکمل خاتمے تک پرائمری اور مڈل اسکول نہ کھولے جائیں۔

اپنی بات جاری رکھتے ہوئے انہوں نے کہا کہ جونیئر کلاسز کے لئے اسکول کھولنے سے کورونا وائرس کی دوسری اور تیسری لہر آنے کا خدشہ ہے۔  جب تک کورونا ختم نہیں ہوجاتا اس وقت تک چھوٹے بچوں کو گھروں پر آن لائن کلاسز کے ذریعے تعلیم دی جائے۔

عذرا فضل پیچوہو کا کہنا تھا کہ  اسکول کھولنے ہیں تو ایس او پیز پر عملدرآمد یقینی بنانا ہوگا۔ اسکول میں 14 سال سے بڑے بچے اپنا خیال رکھ سکتے ہیں اور ایس او پیز پر عمل کرسکتے ہیں لیکن چھوٹے بچوں کو میل ملاپ سے کیسے روکا جاسکتا ہے؟