کورونا کے وار جاری۔۔ پانچ کورونا کیسز کی تصدیق کے بعد قائداعظم یونیورسٹی سیل

اسلام آباد: پاکستان میں کورونا وائرس نئی لہر کے دوران وباء سے متاثرہ مریضوں کی تعداد میں اضافہ ہو رہا ہے، کورونا وائرس کے پانچ کیسز مثبت آنے پر اسلام آباد میں قائد اعظم یونیورسٹی کو سیل کردیا گیا ۔

قائد اعظم یونیورسٹی کی انتظامیہ کی طرف جاری کردہ نوٹیفکیشن کے مطابق یونیورسٹی میں پانچ کورونا کیسز مثبت آئے ہیں جس کے بعد یونیورسٹی کو 6 نومبر تک سیل کردیا گیاہے۔ نومبرتک طلبا کی کلاسز آن لائن ہوں گی۔

نوٹیفکیسن کے مطابق ہاسٹلز میں موجود طلبا کو ہاسٹلز خالی کرنے کی ہدایت کی گئی ہے۔  جب کہ دور دراز سے آئے طلبا شعبوں کے سربراہ سے اجازت لے کر ہاسٹلز میں رہ سکتے ہیں۔ ہاسٹلز میں رہنے والے طلبا کو سماجی فاصلے کا خیال رکھنے کی ہدایت کی گئی ہے۔

ڈپٹی کمشنر اسلام آباد کے جاری کردہ حکم نامے میں کہا گیا ہے کہ ضرورت پڑنے پر یونیورسٹی سٹاف کو طلب کیا جاسکتا ہے۔