کسی نے فکسر کہہ کر پکارا تو اس کے خلاف قانونی چارہ جوئی کروں گا، سلیم ملک

اسلام آباد: سابق ٹیسٹ کرکٹر سلیم ملک نے ناقدین کو خبردار کیا ہے کہ اگر کسی نے انہیں فِکسر کہہ کر پکارا تو اس کے خلاف قانونی چارہ جوئی کریں گے۔

ایک ویڈیو پیغام میں انہوں نے کہا کہ میں نے طویل عدالتی جنگ لڑنے کے بعد اپنا نام کلیئر کروایا، جن لوگوں نے ایسا نہیں کیا، جن کو عدالت سے کلین چٹ نہیں ملی، ان کے نام لیں، ان کو جو مرضی کہہ کر پکاریں لیکن اگر کسی نے مجھے فکسر کہا تو اس کے خلاف عدالت میں کیس دائر کروں گا۔

سابق ٹیسٹ کرکٹر سلیم ملک کا مزید کہنا تھا کہ پاکستان کرکٹ بورڈ (پی سی بی) کی جانب سے سوالات کے جواب جمع کروانے کے لیے پیر کو دو سے تین بجے کے درمیان قذافی اسٹیڈیم آرہا ہوں، اس موقع پر میڈیا سے بات کرتے ہوئے اپنا موقف بھی پیش کروں گا۔

واضح رہے سلیم ملک گزشتہ دنوں اچانک منظر عام پر آئے اور کہا کہ سپاٹ فکسنگ کیس میں ملوث محمد عامر، سلمان بٹ، محمد آصف اور شرجیل خان کی کرکٹ میں واپسی ہوگئی تو مجھے کیوں مواقع سے محروم رکھا جا رہا ہے حالانکہ میرا نام عدالت سے کلیئر ہو چکا۔