لاہورقلندرز مسلسل دوسری بار پی ایس ایل کی چمپئن،ملتان سلطانز کو شکست

لاہور : ملتان کو شکست دے کر لاہور قلندرز مسلسل دوسری بار پاکستان سپر لیگ کا چیمپئن بن گیا۔لاہور پہلی ٹیم ہے جس نے پی ایس ایل میں اعزاز کا دفاع کیا ہے۔پی ایس ایل 8 کی ٹرافی کیلئے حتمی معرکہ لاہور قلندرز اور ملتان سلطانز کے درمیان لاہور کے قذافی اسٹیڈیم میں ہوا۔

دفاعی چیمپئن لاہور قلندرز کے کپتان شاہین آفریدی نے ٹاس جیت کر پہلے بیٹنگ کا فیصلہ کیا ، لاہور نے پہلے کھیلتے ہوئے مقررہ اوورز میں 200 رنز بنائے اور ملتان کو جیت کیلئے 201 رنز کا ہدف ملا۔

لاہور کی جانب سے عبداللہ شفیق 65، فخر زمان 39 اور شاہین آفریدی نے برق رفتار 15 گیندوں پر 44 رنز بنائے۔ شاہین آفریدی نے 5 چھکے اور 2 چوکے بھی لگائے۔ ملتان کی جانب سے اسامہ میر نے 3 کھلاڑیوں کو آؤٹ کیا۔جواب میں ملتان سلطانز نے ڈٹ کر مقابلہ کیا تاہم مقررہ اوورز میں 199 رنز بناسکی اور ایک رن سے شکست کھا گئی۔

ملتان کی جانب سے رلی روسو 52 ، رضوان 34 اور خوشدل شاہ 25 رنز بناکر نمایاں رہے۔ لاہور کی جانب سے کپتان شاہین آفریدی نے آل راؤنڈ کارکردگی کا مظاہرہ کیا ، پہلے بیٹنگ میں انہوں نے 44 رنز بنائے اور پھر ہدف کے دفاع میں 4 کھلاڑیوں کو بھی پویلین کی راہ دکھائی۔راشد خان نے دو جبکہ ڈیوڈ ویسا نے ایک وکٹ حاصل کی۔

میچ جیتنے کے بعد گفتگو کرتے ہوئے شاہین شاہ آفریدی نے کہا کہ میں نے سوچا تھا مشکل وقت ٹیم کے کام آئوں گا ، والدین کی دعائوں سے جیت حاصل ہوئی۔

شاہین شاہ آفریدی کو مین آف دی میچ کا ایوارڈ دیا گیا۔ملتان کے عباس آفریدی کو بیسٹ بولر آف دی ٹورنامنٹ کا ایوارڈ ملا۔ملتان کے کپتان محمد رضوان 550 رنز بناکر ٹورنامنٹ کے بہترین بیٹر قراردیا گیا۔

لاہور کے فخرزمان ٹورنامنٹ میں سب سے زیادہ چھکے لگانےوالے بیٹر قرار دی گیا۔ٹورنامنٹ کے بیسٹ ایمرجنگ پلیئر کا ایوارڈ بھی عباس آفریدی کو ملا۔کراچی کنگز کے عماد وسیم ٹورنامنٹ کے بہترین آل راؤنڈر قراردیئے گئے۔کیرون پولارڈ بیسٹ فیلڈر آف دی ٹورنامنٹ قرار۔محمد رضوان ٹورنامنٹ کے بہترین وکٹ کیپر قرار۔محمد رضوان کو ٹورنامنٹ کے بہترین وکٹ کیپر کا ایوارڈ ملا۔احسان اللہ پلیئر آف دی ٹورنامنٹ کا اعزاز حاصل کیا، احسان اللہ نے ٹورنامنٹ میں 22 وکٹیں حاصل کیں۔فائنل میچ سے قبل ایونٹ کی رنگا رنگ اختتامی تقریب بھی ہوئی جس میں نامور فنکاروں نے اپنے فن کا مظاہرہ کیا۔