بنگلا دیش سےجیتنے کیلئے بہترین بیٹنگ، باولنگ اور فیلڈنگ کرنا ہوگی، مصباح الحق

لاہور: پاکستان کرکٹ ٹیم کے چیف کوچ مصباح الحق کا کہنا ہے کہ بنگلا دیش سے جیتنے کے لیے گرین شرٹس کو بیٹنگ، باولنگ اور فیلڈنگ تینوں شعبوں میں عمدہ کارکردگی دکھانا ہوگی۔

لاہور میں تقریب کے دوران میڈیا سے گفتگو میں مصباح الحق نے کہا کہ بنگال ٹائیگرز لیگ کھیل کر آرہے ہیں جس کی وجہ سے ان کے پلیئرز فارم میں ہوں گے، سیریز کے دوران پاکستان یا بنگلا دیش میں سے کسی بھی ٹیم کو فیورٹ نہیں کہا جا سکتا تاہم دونوں ٹیموں کے درمیان سیریز کے اچھے مقابلے ہوں گے جب کہ مہمان سائیڈ کے خلاف سیریز میں کامیابی کے لیے گرین شرٹس کو اچھی کرکٹ کھیلنا ہوگی۔

ایک سوال پر چیف کوچ کا کہنا تھا کہ بنگلا دیش کے خلاف سیریز جیتنے کے لئے بھر پور تیاریوں کا سلسلہ جاری ہے، اتوار کو بھی پریکٹس کے بعد ٹارگٹ میچز کھلائے گئے جس میں کھلاڑیوں کی فٹنس کے ساتھ تینوں شعبوں میں مہارت کا جائزہ لیا گیا۔

چیف کوچ کا کہنا تھا کہ بنگال ٹائیگرز کے خلاف فتح کو یقینی بنانے کے لئے قومی کرکٹرز کو بیٹنگ، بولنگ اور فیلڈنگ تینوں شعبوں میں عمدہ کارکردگی کا مظاہرہ کرنا ہوگا۔