جنوبی افریقا کے معروف بلے باز ہاشم آملہ پی ایس ایل5 کیلئے پشاور زلمی سے منسلک

اسلام آباد: جنوبی افریقا کے معروف بلے باز ہاشم آملہ پاکستان سپر لیگ سیزن فائیو کے لئے پشاور زلمی سے منسلک ہوگئے۔ ہاشم آملہ پاکستان سپر لیگ 5 میں پشاور زلمی کے بیٹنگ مینٹور کی ذمہ داریاں سنبھالیں گے۔

پشاور زلمی کے چیئرمین جاوید آفریدی نے مایہ ناز بیٹسمین کو خوش آمدید کہتے ہوئے کہا کہ ہاشم آملہ لیجنڈری بیٹسمین اور دنیائے کرکٹ کا بڑا نام ہیں۔ پشاور زلمی کے ہیڈکوچ اور ڈائریکٹر کرکٹ محمد اکرم کا کہنا ہے کہ ہاشم آملہ کا پشاور زلمی سے منسلک ہونا خوشی کا باعث ہے۔

ان کا کہنا تھا کہ پشاور زلمی ہر سال پی ایس ایل میں نوجوان کرکٹرز کو بڑے کرکٹ لیجنڈز کے ساتھ وقت گزارنے کا موقع فراہم کرتی ہے، ہاشم آملہ کی موجودگی سے جہاں بیٹسمین کو فائدہ ہوگا وہیں ہمارے نوجوان کرکٹرز کو بہت کچھ سیکھنے کا موقع ملے گا۔

واضح رہے کہ لیجنڈری بیٹسمین ہاشم آملہ اپنے کرکٹ کیریئر میں 124 ٹیسٹ، 181 ون ڈے اور 44 ٹی ٹوئنٹی میچز میں جنوبی افریقا کی نمائندگی کرچکے ہیں۔