حکومت کی اجازت کے بغیر پاکستان کے ساتھ کرکٹ میچ نہیں ہوسکتا، بھارتی بورڈ

بھارتی کرکٹ بورڈ نے پاکستان کے ساتھ کرکٹ سیریز کھیلنے سے متعلق اپنا پرانا موقف دہراتے ہوئے کہا ہے کہ حکومتی اجازت کے بغیر پاکستان سے میچز نہیں ہو سکتے۔

ایک غیر ملکی خبررساں ادارے سے گفتگو میں بی سی سی آئی کے ایک عہدیدار کا کہنا تھا کہ انٹرنیشنل کرکٹ کونسل (آئی سی سی) کی تنازعات کے حل کیلیے قائم کی جانے والی کمیٹی نے بھی ہمارا (بھارتی) موقف تسلیم کیا جس کی وجہ سے پاکستان کرکٹ برڈ ہرجانہ وصولی کیس میں ناکام رہا۔

بھارتی کرکٹ بورڈ کے عہدیدار نے کہا کہ بھارت کے وکلا نے کمیٹی کو بتایا کہ صرف پاکستان کے ساتھ باہمی سیریز کی بات نہیں، بی سی سی آئی کو کسی بھی ایونٹ میں شرکت کیلیے حکومت کی اجازت درکار ہوتی ہے اور کلیئرنس نہ ملے تو ہم کچھ نہیں کرسکتے، آئی سی سی نے یہ موقف تسلیم کیا۔

بھارتی بورڈ کے عہدیدار نے مزید کہا کہ اب بھی صورت حال یہی ہے کہ ہاکستان کے ساتھ حکومت کی اجازت ملنے پر ہی کھیل سکتے ہیں، آئی سی سی ویمنز چیمپئن شپ میں پاکستان اور بھارت کے میچز ممکن نہ ہونے پر ٹیکنیکل کمیٹی کی جانب سے پوائنٹس برابر تقسیم کرنے کے فیصلے کو سراہا۔