اسپاٹ فکسنگ کیس میں عمراکمل کیلئے ریلیف۔۔کھیلنے پر پابندی ڈیڑھ سال کردی گئی

پاکستانی ٹیسٹ کرکٹر عمر اکمل کو اسپاٹ فکسنگ کیس میں ریلیف مل گیا، عمر اکمل کی سزا 3سال سے کم کرکے ڈیڑھ سال کردی گئی۔

اسپاٹ فکسنگ کیس میں 3 سالہ پابندی کے خلاف ٹیسٹ کرکٹر عمر اکمل کی اپیل کا محفوظ فیصلہ سنادیا گیا۔ نیشنل ہائی پرفارمنس سینٹر لاہور میں پاکستان کرکٹ بورڈ (پی سی بی) کے آزادانہ ایڈجیوڈیکیٹر جسٹس ریٹائرڈ فقیر محمد کھوکھر نے 17 روز پہلے سماعت کے بعد محفوظ کیے گئے فیصلے سے دونوں فریقین کو آگاہ کیا۔

فیصلے میں قرار دیا گیا ہے کہ ٹیسٹ کرکٹر عمر اکمل کی سزا میں ڈیرھ سال کمی کردی گئی ہے۔ اب وہ تین سال کے بجائے ڈیڑھ سال بعد 19 اگست 2021 کے بعد سے کھیلنے کے اہل ہوں گے۔

واضح رہے کہ پاکستان سپر لیگ 2020 کے آغاز سے پہلے دو مختلف واقعات میں عمر اکمل نے مشکوک لوگوں سے ملاقات کی تھی تاہم اس بارے میں ٹیسٹ کرکٹر نے پی سی بی اینٹی کرپشن یونٹ کو آگاہ نہیں کیا تھا۔

جس پر لیگ شروع ہونے سے ایک روز پہلے 20 فروری کو انہیں فوری طور پر معطل کردیا گیا تھا۔ لیگ کے بعد پی سی بی کے اینٹی کرپشن ٹربیونل کے جج جسٹس ریٹائرڈ فضل میراں چوہان نے کیس کی سماعت کرتے ہوئے انہیں 3 سال پابندی کی سزا سنائی تھی ۔