اسپین کی پارلیمنٹ میں چوہا گھس آنے سے ارکان اسمبلی کی دوڑیں لگ گئیں

عالمی خبر رساں ادارے کے مطابق اسپین کے صوبے اندولسیا کی مقامی پارلیمنٹ میں اہم اجلاس جاری تھا جس میں اہم امور پر قانون سازی بھی کی جانی تھی تاہم اس نہایت سنجیدہ صورت حال میں اس وقت کھلبلی مچ گئی جب اسمبلی ہال میں ایک چوہا گھس آیا۔بھاری بھرکم چوہے کی موجودگی کا احساس سب سے پہلے خاتون رکن اسمبلی کو ہوا اور وہ اپنی چیخ نہ روک سکیں جس پر دیگر ارکان بھی متوجہ ہوئے۔ ایوان چیخ و پکار سے گونج اُٹھا۔

ویسے تو ایوان میں چیخ و پکار کوئی نئی بات نہیں لیکن اس بار وجہ مخالفین کے ایک دوسرے پر تابڑ توڑ لفظی حملے نہیں بلکہ چوہا تھا۔کئی ارکان تو موٹے تازے چوہے کو دیکھ کر اپنی نشست سے بھاگ کھڑے ہوئے ۔شریر چوہے کے پکڑے جانے تک ایوان میں کارروائی نہ ہوسکی اور ارکان اسمبلی اپنی کرسیوں اور میزوں کے نیچے چوہے کو ڈھونڈتے رہے۔واقع چار روز قبل پیش آیا۔