برطانیہ اور فرانس میں آج سے سرحدیں کھولنے پر اتفاق ہوگیا

فرانس اور برطانیہ میں کورونا وائرس کے باعث لگائی گئی سفری پابندیاں نرم کر دی گئی ہیں اور دونوں ممالک میں بحری، فضائی اور زمینی سفردوبارہ شروع کرنے پر اتفاق ہوگیا ہے۔فرانس اور برطانیہ کے درمیان اشیا کی ترسیل کی بحالی کا معاہدہ بھی طے پا گیا ہے، برطانوی شہریوں کو فرانس میں داخلے کی اجازت کورونا ٹیسٹ کی رپورٹ پیش کرنے کے ساتھ مشروط کی گئی ہے۔

فرانسیسی وزیر اعظم جین کے دفتر کی جانب سے جاری کردہ اعلامیہ میں کہا گیا ہے کہ برطانیہ میں موجودفرانسیسی شہری بدھ سے وطن واپس آ سکتے ہیں تاہم انہیں بہتر گھنٹے پہلے کی کورونا ٹیسٹ منفی آنے کی رپورٹ دکھانی پڑے گی۔نئی شرائط یورپی یونین کے دیگر ممالک کے شہریوں پر بھی لاگو ہوں گی۔

اتوار کو فرانس نے کورونا وائرس کی نئی قسم سامنے آنے کے بعد برطانیہ پر سفری پابندیاں عائد کی تھیں۔ ان پابندیوں کے باعث اس وقت ڈوور بندرگاہ کے قریب یورپ جانے والے قریباً تین ہزار ٹرک پھنسے ہوئے تھے۔یہ معاہدہ 6 جنوری 2021 تک نافذ العمل رہے گا تاکہ 31 دسمبر کو اس کا دوبارہ جائزہ لیا جائے گا۔