سرد ترین کینیڈا میں کڑاکے کی گرمی،233 افراد ہلاک۔۔سکول،ویکسی نیشن سینٹربند

کینیڈا کے صوبہ برٹش کولمبیا کے شہر وینکوور میں جمعہ سے ہیٹ ویو کا سلسلہ جاری ہے جس کے باعث پہلی بار درجہ حرارت 49.5 ڈگری سینٹی گریڈ تک پہنچ گیا ہے جس کے نتیجے میں233 افراد ہلاک ہو گئے ہیں۔

فرانسیسی خبررساں ادارے کے مطابق محکمہ پولیس وینکوور اور رائل کینیڈین ماؤنٹڈ پولیس نے گزشتہ روز بتایا کہ وینکوور میں درجہ حرارت پہلے کبھی اس انتہائی سطح پر نہیں پہنچا تھا جہاں پہلی بار درجہ حرارت 49.5 ڈگری سینٹی گریڈ تک پہنچ گیا ہے اور ہیٹ ویو سے جمعہ سے اب تک کم از کم 233 افراد ہلاک ہو چکے ہیں،وینکوور میں ہیٹ ویوی کے باعث سکول اور کورونا ویکسی نیشن سینٹرز بند رہیں گے۔

کینیڈا کے محکمہ ماحولیات نے صوبہ برٹش کولمبیا اور اردگرد کے علاقوں کے لیے پورے ہفتے ہیٹ ویو کا سلسلہ جاری رہنے کی وارننگ جاری کی ہے، امریکی محکمہ موسمیات نے شہریوں کے لیے ہدایات جاری کرتے ہوئے کہا ہے کہ وہ باہر نہ نکلیں اور ایئرکنڈیشنڈ کمروں میں رہیں ، وافر مقدار میں پانی پیئں اور اپنے ہمسایوں اور اپنے اہل خانہ کا خیال رکھیں۔

کینیڈا کے ماہر امور موسمیات ڈیوڈ فلپ نے کہا کہ یہ صحرائی گرمی ہے جو بہت ہی خشک اور گرم ہے۔ ہم دنیا کا دوسرا سرد ترین اور برفیلا ملک ہیں اور ہم اکثر سرد موسم اور برفانی طوفان دیکھتے ہیں لیکن اس طرح کے گرم موسم کے بارے میں بات نہیں کرتے ہیں کیونکہ یہاں ایسی گرمی نہیں پڑتی۔ اب جو موسم یہاں ہے اس کے مقابلے میں دبئی اس وقت زیادہ ٹھنڈا ہو گا۔

کینیڈین شہر وینکوور میں حکام نے سڑکوں کے کنارے عارضی فوارے اور نمی پیدا کرنے والے مراکز قائم کیے ہیں جبکہ جنگلوں اور فشریز کے محکموں کو ممکنہ طور پر آگ لگنے کے واقعات کے بارے خبر دار کر دیا گیا ہے۔ ساحلوں اور سوئمنگ پولز میں عوام کا رش بڑھ گیا ہے اور ہنگامی امداد کے دفاتر میں کالز کی بھرمار ہے جہاں لوگوں نے ایمبولینسز کے پہنچنے میں تاخیر کی شکایات کیں۔

محکمہ موسمیات کینیڈا نے برٹش کولمبیا، البرٹا، مینیٹوبا، یوکون اور شمال مغربی علاقوں کے لیے انتباہ جاری کیا ہے کہ وہاں گرمی کی طویل، خطرناک اور تاریخی لہر پورا ہفتہ جاری رہنے کا امکان ہے۔