روس اور بیلاروس کا ٹیکٹیکل جوہری ہتھیاروں کی مشقوں کا دوسرا مرحلہ شروع

روس اور بیلاروس نے ٹیکٹیکل جوہری ہتھیاروں کی مشق کا دوسرا مرحلہ شروع کر دیا ہے۔ ماسکو کا کہنا ہے کہ یہ مشقیں امریکا اور اس کے یورپی اتحادیوں کی طرف سے روزانہ کی اشتعال انگیزیوں کا جواب ہیں اور یوکرین کے لیے حمایت بڑھانے سے مغرب کی حوصلہ شکنی کی کوششوں کا حصہ ہے۔

روس نے گزشتہ ماہ مشقوں کا اعلان اس وقت کیا تھا جب فرانسیسی صدر ایمانوئل میکرون نے کہا تھا کہ وہ بعض شرائط کے تحت یوکرین میں فوجیوں کی تعیناتی کو مسترد نہیں کریں گے اور امریکا اور نیٹو کے کچھ دوسرے اتحادیوں نے کہا کہ کیف کو روس کے سرحدی علاقوں میں اپنے اہداف پر مغربی سپلائی والے ہتھیار استعمال کرنے کی اجازت ہے۔

واضیع رہے روس اور بیلاروس کی پہلی مشقیں گزشتہ ماہ ہوئی تھیں اور ان میں جوہری مشن کی تیاری اور میزائلوں کو مسلح اور تعینات کرنے پر توجہ مرکوز کی گئی تھی۔
منگل کو شروع ہونے والی ان مشقوں میں، روسی وزارت دفاع نے کہا کہ روسی اور بیلاروسی فوجی جنگ میں استعمال ہونے والے غیر اسٹریٹجک جوہری ہتھیاروں کی مشترکہ تربیت سے گزریں گے۔ اس مشق کا مقصد روس اور بیلاروس کے درمیان اتحاد کی خودمختاری اور علاقائی سالمیت کو یقینی بنانے کے لیے اہلکاروں اور آلات کی تیاری کو برقرار رکھنا ہے۔

کریملن کے ترجمان دمتری پیسکوف نے صحافیوں سے بات کرتے ہوئے کہا کہ یورپ میں حالات کافی کشیدہ ہیں اور امریکا اور اس کے اتحادیوں کے معاندانہ فیصلوں اور ۔اقدامات اور ان کی روزمرہ کی اشتعال انگیزیوں کے پیش نظر اس طرح کی مشقیں اور جنگی تیاری کو برقرار رکھنا ضروری ہے۔دو سال قبل 24 فروری 2022 کو یوکرین میں ہزاروں فوجیوں کو پورے پیمانے پر حملے میں بھیجنے کے بعد سے روسی صدر ولادیمیر پیوٹن نے بارہا خبردار کیا ہے کہ روس انتہائی حالات میں اپنے دفاع کے لیے جوہری ہتھیار استعمال کر سکتا ہے۔

پچھلے سال، روس نے اپنے کچھ ٹیکٹیکل جوہری ہتھیار بیلاروس میں منتقل کیے، جس کی سرحد یوکرین اور نیٹو ممالک کے ارکان پولینڈ، لٹویا اور لتھوانیا سے بھی ملتی ہے۔ بیلاروس کے صدر الیگزینڈر لوکاشینکو کا روس کے ساتھ قریبی تعلقات پر انحصار ہے اور انہوں نے اپنا ملک روس کو یوکرین میں جنگ کے لیے ایک اسٹیجنگ گراؤنڈ کے طور پر فراہم کیا ہے۔

ٹیکٹیکل جوہری ہتھیاروں میں مختصر فاصلے تک مار کرنے والے میزائلوں اور توپ خانے کے گولہ بارود کے لیے ہوائی بم وار ہیڈز شامل ہیں اور یہ میدان جنگ میں استعمال کے لیے ہیں۔ عام طور پر وہ اسٹریٹجک ہتھیاروں سے کم طاقتور ہوتے ہیں – بہت بڑے وار ہیڈز جو بین البراعظمی بیلسٹک میزائلوں کو مسلح کرتے ہیں اور ان کا مقصد پورے شہروں کو تباہ کرنا ہوتا ہے۔

روس کے صدر ولادیمیر پیوٹن نے موازنہ کرتے ہوئے کہا ہے کہ روس کے میدان جنگ کے جوہری ہتھیار بھی اگست 1945 میں امریکا کی جانب سے جاپان پر گرائے گئے دو ایٹم بموں سے کہیں زیادہ طاقتور ہیں۔

گزشتہ ہفتے، پیوٹن نے اعلان کیا کہ مغرب کا یہ مفروضہ غلط ہے کہ روس کبھی بھی اپنے جوہری ہتھیاروں کو استعمال نہیں کرے گا۔ ملک کا جوہری نظریہ روسی ریاست کے وجود کے لیے خطرہ ہونے کی صورت میں جوہری ہتھیاروں کے استعمال کا تصور کرتا ہے۔امریکی حکام نے کہا ہے کہ انہوں نے روس کے اسٹریٹجک موقف میں کوئی تبدیلی نہیں دیکھی ہے حالانکہ سینئر مغربی انٹیلی جنس حکام کا کہنا ہے کہ انہیں جوہری ہتھیاروں کے بارے میں ماسکو کے ریمارکس کو سنجیدگی سے لینا ہوگا۔فیڈریشن آف امریکن سائنٹسٹس کے مطابق، روس اور امریکا اب تک دنیا کی سب سے بڑی ایٹمی طاقتیں ہیں جن کے پاس دنیا کے 88 فیصد جوہری ہتھیار ہیں۔