ترکی۔ گرم ہوا کا غبارہ پھٹنے سے دو ہسپانوی سیاح خواتین ہلاک

انقرہ: ترکی کے مشہور سیاحتی مقام کپاڈوکیا میں گرم ہوا کا غبارہ کریش لینڈ کرنے کے باعث دو ہسپانوی سیاح خواتین ہلاک جبکہ تین زخمی ہوگئی ہیں۔ خواتین کا تعلق سپین کے صوبہ کاتالونیا سے ہے۔

مقامی حکام کے مطابق حادثہ تکنیکی خرابی کے باعث پیش آیا۔ غبارہ لینڈنگ کے دوران قابو میں نہ آسکا اور زور سے زمین پر آگرا۔ غبارے میں عملے کے دو ارکان سمیت تیس افراد سوار تھے۔

ترکی کا قصبہ کپا ڈوکیا زمین دوز گھروں اور گرم ہوا کے غباروں کے لیے پوری دنیا میں مشہور ہے اور سالانہ لاکھوں سیاح وہاں کا رخ کر تے ہیں۔