بیرسٹرسلطان محمود کی اسد عمر سے ملاقات، آزادکشمیر کے آئندہ عام انتخابات پراہم مشاورت

آزاد کشمیر کے سابق وزیر اعظم اور تحریک انصاف آزادکشمیرکے صدربیرسٹر سلطان محمود چوہدری نے وفاقی وزیر پلاننگ اینڈ ڈویلپمنٹ اسد عمر سے تفصیلی ملاقات کی ہے ۔ ملاقات میں آزاد کشمیر کی سیاسی صورتحال، آئندہ انتخابات سمیت باہمی دلچسپی کے امورپر تبادلہ خیال کیا گیا۔

اس موقع پر گفتگو کرتے ہوئے وفاقی وزیر اسد عمر نے کہا کہ حکومت پاکستان نے فراخدلی سے آزاد کشمیر کی تعمیر و ترقی کے لئے فنڈز فراہم کیے ہیں تاکہ آزاد کشمیر میں بھی خوشحالی کے نئے دور کا آغاز ہو۔ وزیر اعظم عمران خان چاہتے ہیں کہ آزاد کشمیر کے عوام کا معیار زندگی مزید بہتر کیا جائے ، اس لیے وزیر اعظم کے ویژن کے مطابق وفاقی حکومت نے صحت ،تعلیم اور تعمیر و ترقی کے تمام منصوبوں میں آزاد کشمیر کو بھی شامل رکھا ، آزاد کشمیر کے ڈویلپمنٹ فنڈز کو بھی دوگنا کیا گیا ہے ۔ اسد عمر نےاس تو قع کا اظہا رکہ تحریک انصاف انتخابات جیت کر آزادکشمیر میں بھی حکومت بنائے گی اور وزیر ا عظم کے ویژن کو آگے بڑھاتے ہوئے کرپشن کا خاتمہ کرے گی۔

بیرسٹر سلطان محمود چوہدری نے وفاقی وزیر پلاننگ اینڈ ڈویلپمنٹ اسد عمر کو آزاد کشمیر میں تعمیر ترقی کے حوالے سے اقدامات اٹھانے کے لئے بریفنگ دی اور اپنی عوامی رابطہ مہم سے بھی آگاہ کیا۔