یوم کشمیر سے متعلق پوسٹر نمائش،رانا تنویر حسین اور مشعال ملک کی شرکت

کشمیری عوام کے ساتھ اظہار یکجہتی کے لیے نیشنل کالج آف آرٹس اسلام آباد کیمپ آفس میں 5 فروری کو یوم کشمیر کے حوالے سے پوسٹر نمائش کا انعقاد کیا گیا۔

وائس چانسلر پروفیسر ڈاکٹر مرتضیٰ جعفری نے وفاقی وزیر تعلیم جناب رانا تنویر اور جموں کشمیر لبریشن فرنٹ کے رہنما محمد یاسین ملک کی اہلیہ مسز مشعال حسین ملک کا استقبال کیا۔

 وفاقی وزیر رانا تنویر حسین نے کہا کہ وزارت وفاقی تعلیم اور پیشہ ورانہ تربیت نے کشمیر کاز کو اجاگر کرنے کے لیے ایک مہم کا انعقاد کیا، انہوں نے خاص طور پر کشمیر کاز کو سامنے لانے میں اہم کردار ادا کرنے پر این سی اے کی کوششوں کو سراہا۔  انہوں نے کہا کہ نوجوانوں کو کشمیریوں کی جدوجہد آزادی سے آگاہ کرنا بہت ضروری ہے۔  انہوں نے نمائش میں موجود فن پاروں کی تعریف کی اور اس نمائش کے انعقاد پر وائس چانسلر پروفیسر ڈاکٹر مرتضیٰ جعفری کا شکریہ ادا کیا۔

  مشعال حسین ملک نے نمائش دیکھنے کے بعد تہہ دل سے شکریہ ادا کیا اور کہا کہ آرٹ کا کشمیری عوام کی جدوجہد کے اظہار میں اہم کردار ہے کیونکہ آرٹ مسئلہ کشمیر کے کرب اور المیوں کو بیان کر کے ہر کسی کے دلوں تک پہنچا سکتا ہے۔

مشعال حسین ملک نے یہ بھی کہا کہ این سی اے کا دل میں ایک خاص مقام ہے اور وہ ہمیشہ ان کے تقاریب کا حصہ بن کر حوصلہ افزائی اور اعزاز محسوس کرتی ہیں۔