تاجروں کو  ٹیکس نیٹ میں لانے کے لیے ’تاجردوست‘موبائل ایپ تیار

 تاجروں کو ٹیکس نیٹ میں لانے اور رجسٹریشن کے لیے ایف بی آر نےاسکیم فائنل کرلی۔ اسکیم کے تحت الیکشن سے قبل تاجروں کے لیے ریٹیلر اسکیم متعارف کرانے کا فیصلہ کیا ہے۔

ذرائع کے مطابق موبائل ایپ کے تحت ٹیکس نیٹ سے باہرتاجروں کو تاجر دوست ایپ کے ذریعے رجسٹرڈ کیا جائے گا۔ اس ایپ کے ذریعے دکان داروں کی آمدن کا ریکارڈ ایف بی آرکو موصول ہوگا۔ ذرائع کے مطابق دکان داروں پر سالانہ آمدن کے مطابق ٹیکس عائد ہوگا جسے ماہانہ وصول کیا جائے گا۔

اس اسکیم سے اسلام آباد، کراچی، لاہور، پشاور اور کوئٹہ میں ریٹیلرز سے 100 ارب روپے ٹیکس آمدن متوقع ہے ۔  دوسرے مرحلے میں دیگر شہروں کے تاجروں کی رجسٹریشن شروع کی جائےگی ۔ اسکیم کے تحت ملک بھرکے ریٹیلرز پر ٹیکس سے تقریباً 300 ارب سے زائد کی آمدن متوقع ہے۔ذرائع کے مطابق دکان کے سائز اور سالانہ آمدن پر ٹیکس عائد کیا جائےگا جو ماہانہ بنیاد پر جمع ہوگا۔