بھارتی جارحانہ پالیسیاں علاقائی امن اورسلامتی کیلئے شدیدخطرہ ہیں، شاہ محمود قریشی

اسلام آباد: وزیر خارجہ شاہ محمود قریشی کا کہنا ہے کہ بھارت میں انتہاء پسند مودی سرکار کی پالیسیاں خطے کے امن اور سلامتی کے لیے شدید خطرہ ہیں۔

دفتر خارجہ سے جاری اعلامیے کے مطابق وزیرخارجہ شاہ محمود قریشی نے آئرلینڈ کے نائب وزیراعظم اور وزیرخارجہ سیمن کووینی سے ٹیلیفونک رابطہ کیا ہے، دونوں رہنماؤں نے دو طرفہ تعلقات، کورونا صورتحال سمیت باہمی دلچسپی کے امور پر بات چیت کی

آئرش وزیر خارجہ نے عالمی وباء کے دوران ترقی پذیر ممالک کو قرضوں میں ریلیف دینے کی وزیراعظم عمران خان تجویز کو سراہتے ہوئے اس سلسلے میں اپنا موثر کردار ادا کرنے کی یقین دہانی بھی کرائی، دونوں ممالک کے وزرائے خارجہ نے کورونا وائرس کے پھیلاؤ کو روکنے کے لیے مشترکہ حکمت عملی اپنانے، مشاورت کا سلسلہ جاری رکھنے پر اتفاق کیا۔

آئرش وزیر خارجہ کا کہنا تھا کہ کورونا وائرس ویکسین بننے کے بعد ترقی یافتہ اورترقی پذیر ممالک کے لیے بھی دستیابی ہونی چاہیے، سکیورٹی کونسل اصلاحات پرآئرلینڈ اور پاکستان کی سوچ میں مماثلت پائی جاتی ہے۔ ان کا کہنا تھا کہ خطے کی صورتحال پر مسلسل نظر رکھے ہوئے ہیں، انسانی حقوق کی خلاف ورزیوں کے حوالے سے آئرلینڈ کا نکتہ نظر واضح ہے۔

وزیرخارجہ شاہ محمود قریشی نے مقبوضہ کشمیر میں جاری دوہرے لاک ڈاؤن پر تشویش کا اظہار کرتے ہوئے کہا کہ قابض بھارتی فوج مقبوضہ وادی میں کریک ڈاؤن کے نام پر آپریشنز میں تیزی لا رہی ہے۔ انہوں نے بھارت کی طرف سے مقبوضہ کشمیر کی جغرافیائی حدود تبدیل کرنے کی مذمت کرتے ہوئے کہا یہ سکیورٹی کونسل سمیت عالمی قوانین کی خلاف ورزی ہے۔

اپنی بات جاری رکھتے ہوئے وزیر خارجہ نے نشاندہی کی کہ بھارتی حکومت کی پالیسیاں خطے کے امن اور سلامتی کے لیے شدید خطرہ ہیں۔ شاہ محمود قریشی نے ٹیلیفونک رابطے کے دوران بھارت میں اسلامو فوبیا اور کورونا وائرس کی وباء کے دوران مسلمانوں پر تشدد پر شدید تشویش کا اظہار کیا۔