اسلام آباد، پنجاب اور خیبر پختونخوا میں 5.5 شدت کا زلزلہ

اسلام آباد: وفاقی دارالحکومت اسلام آباد سمیت پنجاب اور خیبر پختونخوا کے مختلف علاقوں میں ہفتے کے روز زلزلے کے شدید جھٹکے محسوس کیے گئے، جن کی شدت ریکٹر اسکیل پر 5.5 ریکارڈ کی گئی۔ زلزلے کے باعث کئی شہروں میں خوف و ہراس پھیل گیا اور لوگ کلمہ طیبہ کا ورد کرتے ہوئے گھروں اور عمارتوں سے باہر نکل آئے۔

زلزلہ پیما مرکز کے مطابق زلزلے کا مرکز راولپنڈی سے 60 کلومیٹر شمال مغرب میں تھا جبکہ اس کی گہرائی 12 کلومیٹر ریکارڈ کی گئی۔ زلزلے کے جھٹکے اسلام آباد، لاہور، ہری پور، سوات، مالاکنڈ، ایبٹ آباد، چارسدہ، صوابی، ٹیکسلا، حسن آباد، اٹک، سانگلہ ہل، خان پور ہزارہ، کندیاں، چشمہ، پپلاں اور دیگر کئی علاقوں میں محسوس کیے گئے۔

پنجاب ڈیزاسٹر مینجمنٹ اتھارٹی (PDMA) کے ترجمان کے مطابق ابتدائی رپورٹس موصول ہو چکی ہیں جن کے مطابق تاحال کسی بھی علاقے سے جانی یا مالی نقصان کی اطلاع نہیں ملی۔ ترجمان کا کہنا تھا کہ صوبے بھر کی انتظامیہ عمارتوں کی جانچ میں مصروف ہے جبکہ ممکنہ آفٹر شاکس سے نمٹنے کے لیے مشینری اور ایمرجنسی عملے کو الرٹ رکھا گیا ہے۔

ترجمان کے مطابق پی ڈی ایم اے کا مرکزی کنٹرول روم اور پنجاب کے تمام اضلاع کے ایمرجنسی آپریشن سینٹرز 24 گھنٹے فعال ہیں۔ شہری کسی بھی ہنگامی صورت حال میں پی ڈی ایم اے کی ہیلپ لائن 1129 پر اطلاع دے سکتے ہیں۔