بھارت میں مسلمانوں سے امتیازی سلوک قائداعظم کے یقین کی تصدیق ہے، عمران خان

اسلام آباد: وزیراعظم عمران خان نے کہا ہے کہ بھارت میں مسلمانوں سے امتیازی سلوک قائداعظم کے یقین کی تصدیق ہے۔ انتہا پسند ہندو بھارت میں مسلم اقلیت کوعزت اور وقار کے ساتھ نہیں رہنے دیں گے۔

وزیراعظم عمران خان نے قائد اعظم کے یوم پیدائش کے موقع پر پیغام میں کہا کہ مسلمانوں کے لیے آزاد وطن بنانے میں قائداعظم نے بے لوث مثالی کردار پیش کیا، انہوں نے پوری دنیا میں لاکھوں افراد کو متاثر کیا، قائداعظم نے جس فیصلہ کن تحریک آزادی کی سربراہی کی وہ ان کی سیاسی بصیرت کا مظہر ہے۔

انہوں نے کہا کہ دنیا بھر میں آج نام نہاد سیکولر بھارت کا چہرہ بے نقاب ہو گیا ہے، بھارت میں اقلیتوں بالخصوص مسلمانوں کے ساتھ امتیازی سلوک قائداعظم کے یقین کی تصدیق ہے، انہیں یقین تھا ہندوستان کے انتہا پسند ہندو مسلم اقلیت کوعزت اور وقار کے ساتھ نہیں رہنے دیں گے۔

عمران خان نے کہا کہ ہمیں فاشسٹ بی جے پی حکومت کے ظلم کا شکارکشمیری عوام کو نہیں بھولنا، قائداعظم نے کشمیر کو پاکستان کی “شہ رگ” کہا تھا، آج ہم اپنے عہد کا اعادہ کرتے ہیں، ہمیں اپنے بانی کے نظریات کو سمجھنے اورمقصد کی تکمیل کے لئے طویل سفر طے کرنا ہے،اتحاد ، عقیدے اور نظم و ضبط کے اصولوں پر عمل پیرا ہو کر نیا پاکستان، قائد کا پاکستان بنا سکتے ہیں۔