حکومت نے کرپشن میں اضافے سے متعلق ٹرانسپرنسی انٹرنیشنل کی رپورٹ مسترد کردی

اسلام آباد: تحریک انصاف کی حکومت نے پاکستان میں کرپشن بڑھنے سے متعلق ٹرانسپرنسی انٹرنیشنل کی رپورٹ پر تحفظات کا اظہار کرتے ہوئے اسے مسترد کر دی۔

پارلیمنٹ ہاؤس اسلام آباد کے باہر میڈیا سے گفتگو کرتے ہوئے وزیراعظم کی معاون خصوصی برائے اطلاعات فردوس عاشق اعوان نے کہا کہ پاکستان میں کرپشن سے متعلق ٹرانسپیرنسی انٹرنیشنل کی رپورٹ شفاف نہیں، رپورٹ میں دعویٰ کیا گیا سب سے زیادہ کرپشن مشرف پھرعمران خان کے دورمیں ہوئی ہے۔

اپنی بات جاری رکھتے ہوئے ڈاکٹر فردوس عاشق اعوان کا کہنا تھا کہ تیسرے نمبرپر پیپلزپارٹی اور چوتھے نمبرپر (ن) لیگ کے دورمیں کرپشن ہوئی، اس رپورٹ کو کون مانے گا، جب کہ سندھ میں کرپشن کی طویل داستان لکھی ہوئی ہے۔

معاون خصوصی نے کہا کہ ٹرانسپیرنسی انٹرنیشنل پاکستان چیپٹر کے سربراہ کو (ن) لیگ نے نوازا اور سفیر مقرر کیا تھا اس لیے اس ادارے نے سابق دورمیں (ن) لیگ کی قیادت کو پذیرائی بخشی، ٹرانسپرنسی انٹرنیشنل کو اپنی ساکھ کا جائزہ لینا چاہیے۔

واضح رہے ٹرانسپیرنسی انٹرنیشنل کی رپورٹ میں کہا گیا تھا کہ 2019 میں پاکستان میں کرپشن میں اضافہ ہوا ہے۔