پاکستان کی پہلے ٹیسٹ میچ میں بنگلہ دیش کو اننگز اور 44 رنز سے شکست

راولپنڈی: پنڈی ٹیسٹ میں پاکستان نے بنگلا دیش کو اننگز اور 44 رنز سے شکست دے دی، قومی ٹیم نے 2 میچوں کی سیریز میں ایک صفر کی برتری حاصل کرلی۔ نسیم شاہ مین آف دی میچ قرار پائے۔

دوسری اننگز میں مہمان ٹیم صرف 168 رنز پر ہی ڈھیر ہوگئی، بنگال ٹائیگر کو 39 رنز پر پہلا نقصان اٹھانا پڑا جب نسیم شاہ نے سیف حسن کو 16 رنز کے انفرادی سکور پر کلین بولڈ کیا۔ تمیم اقبال 34 رنز بنا کر یاسر شاہ کے ہاتھوں ایل بی ڈبلیو ہوئے۔

اس موقع پر کپتان مومن الحق نے اپنی ٹیم کے مجموعی سکور کو 100 رنز تک پہنچایا تاہم نجم الحسین شانتو کے 38 رنز پر آؤٹ ہونے سے تیسری وکٹ کیلئے 71 رنز کی قیمتی پارٹنر شپ ختم ہو گئی۔

نسیم شاہ نے شانتو کے بعد تیج الاسلام اورمحمود اﷲ کو یکے بعد دیگرے آؤٹ کر کے ٹیسٹ کیریئر کی پہلی ہیٹرک کی جس کے بعد وہ ٹیسٹ میچ میں ہیٹرک کرنے والے دنیا کے کم عمر ترین فاسٹ باؤلر بن گئے۔ محمد متھن کو بھی کھاتہ کھولنے کا موقع نہیں ملا۔

نسیم شاہ اور یاسر شاہ نے چار، چار وکٹیں لیں، محمد عباس اور شاہین شاہ آفریدی نے ایک ایک کھلاڑی آؤٹ کیا۔ مین آف دی میچ کا اعزاز بھی نوجوان فاسٹ باؤلر نسیم شاہ کے حصے میں آیا۔