بھارتی فوج کی ایل او سی پر بلااشتعال فائرنگ، پاک فوج کے جوان سمیت 3 شہید، دو زخمی

راولپنڈی: بھارت علاقائی امن کا دشمن بن گیا۔ بھارتی فورسز نے لائن آف کنٹرول پر ایک مرتبہ پھر بلا اشتعال فائرنگ  کی ہے جس سے پاک فوج کا لانس نائیک اور دو خواتین شہید اور بچے سمیت دو افراد زخمی ہوگئے۔

مسلح افواج کے شعبہ تعلقات عامہ ( آئی ایس پی آر) کے مطابق بھارتی فوج نے ایل او سی پر کیلر سیکٹر میں پاک فوج کی چیک پوسٹ پر بلا اشتعال فائرنگ کی، دشمن سے لڑتے پاک فوج کے لانس نائیک علی باز شہید ہو گئے، 34 سالہ شہید علی باز کا تعلق ضلع کرک سے تھا۔

آئی ایس پی آر کی جانب سے جاری بیان کے مطابق پاک فوج کی جانب سے دشمن کی شراندازی پر جوابی کارروائی میں فائرنگ کرنے والی بھارتی چوکیوں کو نشانہ بنایا گیا، جس میں انڈین فورسز کو بھاری جانی نقصان کی اطلاعات ہیں۔

دوسری جانب بھارتی فوج نے رکھ چکری سیکٹر میں بلااشتعال فائرنگ کی اور سول آبادی کو بھاری ہتھیاروں سے نشانہ بنایا، بھارتی فائرنگ سے کیرنی گاؤں کی 16 سالہ لڑکی اور 52 سالہ خاتون شہید ہو گئیں جب کہ 10 سالہ بچہ اور ایک خاتون زخمی ہوئے، جنہیں اسپتال منتقل کر دیا گیا۔