کورونا کے وار۔۔ایک روزمیں مزید1324پاکستانی شکار۔۔اموات 459 ہو گئیں

اسلام آباد: پاکستان میں کورونا وائرس کے کیسز روز بروز بڑھتے جارہے ہیں اور آج مزید نئے کیسز کے بعد وباء سے متاثرہ افراد کی مجموعی تعداد 20130 ہوگئی جبکہ اموات 459 تک پہنچ چکی ہیں۔

مئی ماہ کے 3 ہی دن گزرے ہیں اور کورونا وائرس کے کیسز 20 ہزار سے تجاوز کر گئے ہیں جبکہ وباء کے باعث ہونے والی اموات کی تعداد بھی 400 کا ہندسہ عبور کرگئیں۔ آج ایک روز میں کورونا کے ریکارڈ 1324 کیسز ہوئے۔جن میں سندھ سے مزید 363 کیسز شامل ہیں جب کہ صوبے میں 8 اموات سامنے آگئیں۔

وزیراعلیٰ سندھ مراد علی شاہ کے مطابق گزشتہ 24 گھنٹوں میں 3032 ٹیسٹ کیے گئے جس میں 363 کے نتائج مثبت آئے جس کے ساتھ ہی مجموعی تعداد 7465 ہوگئی۔ انہوں نے بتایا کہ 24 گھنٹوں کے دوران مزید 8 افراد زندگی کی بازی ہار گئے جس سے یہ تعداد 130 تک پہنچ گئی۔

دوسری جانب پنجاب میں کورونا وائرس سے مزید 640 افراد متاثر ہونے کی تصدیق ہوئی ہے جب کہ مزید 6 اموات سامنے آئیں۔صوبائی محکمہ صحت کےترجمان کے مطابق پنجاب میں نئے کیسز کے بعد متاثرین کی مجموعی تعداد 7494 ہوگئی ہے۔ جن میں 768 افراد زائرین سینٹر، 1926 افراد رائے ونڈ سے منسلک، 4714 عام شہری اور 86 قیدی ہیں۔ترجمان کے مطابق صوبے میں مجموعی اموات 121 تک پہنچ گئیں جبکہ 22 مریض کی حالت تشویش ناک ہے۔

صبح سویرے آنے والے اعداد و شمار میں وفاقی دارالحکومت اسلام آباد میں مزید 28 کیسز کی تصدیق کی گئی۔سرکاری سطح پر کورونا کے اعداد و شمار بتانے والی ویب سائٹ کے مطابق اسلام آباد میں مجموعی کیسز کی تعداد 365 سے بڑھ کر 393 تک پہنچ گئی۔

ادھر خیبرپختونخوا کے وزیرصحت تیمور سلیم جھگڑا نے کورونا کے 222 نئے کیسز کی تصدیق کی جس کے بعد صوبے میں متاثرہ افراد کی تعداد 3129 تک پہنچ گئی ہے۔صوبے میں گزشتہ 24 گھنٹے کے دوران مزید 8 مریض انتقال کر گئےجس کے بعد صوبے میں اموات کی تعداد 180 ہوگئی ہے۔

اسی طرح گلگت بلتستان میں بھی کورونا وائرس کے مزید 24 کیسز سامنے آئے ہیں، جس کے بعد گلگت بلتستان میں بھی کورونا کے متاثرین 340 سے بڑھ کر 364 ہوگئی ہے۔علاوہ ازیں آزاد کشمیر میں بھی مزید ایک فرد اس وائرس کا شکار ہوگیا۔ جس کے بعد آزاد کشمیر میں متاثرین کی مجموعی تعداد 67 ہوگئی۔

محکمہ صحت بلوچستان نے کورونا وائرس کے مزید 46 کیسز کی تصدیق کی جس کے بعد صوبے میں متاثرہ افراد کی تعداد 1218 ہوگئی۔بیان میں مزید 2 اموات کی بھی تصدیق کی گئی جس کے بعد بلوچستان میں جاں بحق مریضوں کی تعداد 21 ہوگئی ہے۔ حوصلہ افزا امر یہ ہے کہ کورونا وائرس کے مریضوں کی صحت یابی کی شرح میں بھی اضافہ ہو رہا ہے، کورونا کو شکست دینے والے افراد کی مجموعی تعداد 5114 ہوگئی۔