نواز شریف نے تمام جماعتوں کو مل کر حکومت بنانے کی دعوت دے دی

میاں نواز شریف نے کہا ہے کہ ہم سب پارٹیوں اور فرد واحد کے مینڈیٹ کا احترام کرتے ہیں۔ ہم انہیں دعوت دیتے ہیں کہ ملک کو مشکلات سے نکالنے کے لیے ہمارے ساتھ مل کر حکومت بنائیں۔ 

ماڈل ٹاؤن سیکریٹریٹ میں کارکنوں سے خطاب کرتے ہوئے انہوں نے کہا انتخابات میں ن لیگ سب سے بڑی جماعت بن کے ابھری ہے۔

نوازشریف نے کہا کہ آج ہمیں جو مینڈیٹ ملا ہے ضروری ہے کہ دوسری پارٹیاں آئیں اور مل کر ایک حکومت قائم کریں۔ پاکستان کو اس بھنورسے نکالیں، ہم اس بات کے متحمل نہیں ہوسکتے کہ بار باراس ملک میں انتخابات کروائیں۔

نواز شریف نے کہا کہ بہت اچھا ہوتا کہ ہمیں پورا مینڈیٹ ملتا اور ہم حکومت بناتے۔اب ہمارے پاس اتنی اکثریت نہیں ہے کہ حکومت بناسکیں اس لیے ہم الیکشن میں کامیاب ہونے والی اپنی اتحادی جماعتوں کو دعوت دیں گے کہ وہ ہمارے ساتھ مل کر حکومت بنائیں۔

نوازشریف نے کہا کہ میں نے شہباز شریف کی ڈیوٹی لگائی ہے کہ اس سلسلے میں آج ہی یشرفت کرتے ہوئے آصف زرداری، مولانا فضل الرحمان اور ایم کیوایم سے ملاقات کریں۔ حالات اس بات کا تقاضا کرتے ہیں کہ ہم سب مل کرملک کی کشتی کو بھنور سے نکالیں۔

قائد ن لیگ نے کہا کہ ملکی استحکام کے لیے کم از کم 10 سال چاہیئں اور جو لوگ لڑائی کے موڈ میں ہیں ہم ان سے لڑنا نہیں چاہتے۔ پاکستان اس وقت لڑائی افورڈ نہیں کرسکتا۔ ہم سب کو مل جل کر بیٹھنا ہوگا۔

نوازشریف نے اپنے فاتح امیدواروں سے مخاطب ہوتے ہوئے کہا کہ سیاست عبادت سمجھ کر کریں اور عوام کی مشکلات کے حل کے لیے کام کریں۔