پی ٹی آئی کے 50 رہنماؤں کے وارنٹ گرفتاری جاری — سابق صدر عارف علوی اور وزیراعلیٰ خیبرپختونخوا بھی شامل

اسلام آباد: انسداد دہشت گردی عدالت اسلام آباد نے 26 نومبر کے احتجاجی مظاہروں کے سلسلے میں سابق صدر ڈاکٹر عارف علوی، وزیراعلیٰ خیبرپختونخوا علی امین گنڈاپور اور پاکستان تحریک انصاف (پی ٹی آئی) کے دیگر 48 رہنماؤں کے وارنٹ گرفتاری جاری کر دیے ہیں۔

یہ وارنٹس تھانہ کراچی کمپنی میں درج مقدمہ نمبر 1193 کی سماعت کے دوران جاری کیے گئے۔ عدالت نے عدم حاضری پر یہ قدم اٹھایا اور تمام ملزمان کو فوری گرفتار کر کے عدالت میں پیش کرنے کا حکم دیا۔

آج عدالت نے 41 پی ٹی آئی رہنماؤں کے وارنٹ گرفتاری جاری کیے، جبکہ 9 دیگر رہنماؤں کے وارنٹ پہلے ہی جاری کیے جا چکے تھے، یوں مجموعی طور پر 50 رہنماؤں کے خلاف وارنٹ جاری ہو چکے ہیں۔

ملزمان کی فہرست میں سابق صدر ڈاکٹر عارف علوی، سابق وزیراعظم کے مشیر سلمان اکرم راجا، سینیٹر شبلی فراز، فیصل جاوید، مراد سعید، رؤف حسن، احمد نیازی، عبدالقیوم نیازی اور دیگر شامل ہیں۔

مزید ناموں میں وزیراعلیٰ خیبرپختونخوا علی امین گنڈاپور، سابق اسپیکر قومی اسمبلی اسد قیصر، حماد اظہر، عاطف خان، شعیب شاہین، سینیٹر اعظم سواتی، عمر ایوب، صاحبزادہ حامد رضا، علیمہ خانم، شیخ وقاص اکرم، کنول شوزب، شاندانہ گلزار اور شیر افضل مروت شامل ہیں۔

انسداد دہشت گردی عدالت کے جج ابوالحسنات ذوالقرنین نے یہ وارنٹس جاری کیے اور پولیس کو ہدایت کی کہ تمام مطلوبہ افراد کو فوری طور پر گرفتار کر کے عدالت میں پیش کیا جائے۔

یاد رہے کہ راولپنڈی ڈویژن میں 24 اور 26 نومبر کو مختلف مقامات پر ہونے والے مظاہروں کے تناظر میں مجموعی طور پر 32 مقدمات درج کیے گئے ہیں۔ ان میں سے ایک اہم مقدمہ تھانہ ٹیکسلا میں درج کیا گیا ہے جس میں سابق خاتون اول بشریٰ بی بی کو 26 نومبر کے کانسٹیبل قتل کیس میں نامزد کیا گیا ہے۔