صدر،وزیراعظم اورگورنر کے خلاف آرٹیکل سکس کے تحت ریفرنس دائر کرنے کا فیصلہ

 اسلام آباد: وفاقی حکومت نے  آئین شکنی پر صدرمملکت عارف علوی، سابق وزیراعظم عمران خان، سابق ڈپٹی اسپیکر قاسم سوری اور گورنر پنجاب عمر سرفراز چیمہ کے خلاف آرٹیکل سکس کے تحت ریفرنس دائر کرنے کا فیصلہ کرلیا۔ ان شخصیات کی جانب سے سپریم کورٹ اور ہائی کورٹ کے آئین پر عملدرآمد کرنے کے واضح احکامات کی بھی توہین کی گئی ہے ۔

ذرائع کے مطابق وزرات قانون وانصاف اور وزرات داخلہ نے ریفرنس کی تیاری شروع کردی ہے ، ریفرنس میں موقف اختیار کیا جائے گاکہ قومی اسمبلی میں تحریک عدم اعتماد کے موقع پر صدر عارف علوی اور ڈپٹی اسپیکر قاسم سوری نے عمران خان کے ایماء پر آئین شکنی کرتے ہوئے دستور کوسبوتاژکیا۔ صدر عارف علوی نے پارٹی چیئرمین کے حکم پر آئین کو قربان کر دیا جبکہ گورنر پنجاب عمر سرفراز چیمہ نے بھی پنجاب اسمبلی میں آئینی عمل کے خلاف ورزی کی ۔ان شخصیات کی جانب سے سپریم کورٹ اور ہائی کورٹ کے آئین پر عملدرآمد کرنے کے واضح احکامات کی بھی توہین کی گئی ہے ۔

ذرائع کاکہناہے کہ ریفرنس کے لیے بیانات اور قومی و صوبائی اسمبلیوں کا ریکارڈ حاصل کیا جا رہاہے،عدالتی احکامات اورعدالتی نظائر بھی طلب کرلی گئی ہیں جنھیں شواہد کے طور پر ریفرنس کے ساتھ منسلک کیا جائے گا۔