جعفر ایکسپریس پر حملہ: پاک فوج کا کامیاب آپریشن، 33 دہشت گرد ہلاک، 190 یرغمالی بحفاظت بازیاب

ڈی جی آئی ایس پی آر لیفٹیننٹ جنرل احمد شریف چوہدری نے اعلان کیا ہے کہ بولان میں جعفر ایکسپریس پر حملہ کرنے والے تمام 33 دہشت گردوں کو جہنم واصل کر دیا گیا جبکہ 190 یرغمال مسافروں کو بحفاظت بازیاب کرا لیا گیا ہے۔

دہشت گردوں نے ریلوے ٹریک کو دھماکے سے نشانہ بنایا

لیفٹیننٹ جنرل احمد شریف کے مطابق، 11 مارچ کو دہشت گردوں نے ریلوے ٹریک کو دھماکہ خیز مواد سے اڑا کر جعفر ایکسپریس کو روکا اور مسافروں کو یرغمال بنایا۔ دہشت گرد افغانستان سے رابطے میں تھے اور مسافروں کو انسانی شیلڈ کے طور پر استعمال کر رہے تھے۔

پاک فوج، ایئر فورس، ایف سی اور ایس ایس جی کا مشترکہ آپریشن

ڈی جی آئی ایس پی آر کے مطابق، ریسکیو آپریشن میں پاک فوج، ایئر فورس، ایف سی اور ایس ایس جی کے جوانوں نے حصہ لیا۔ دہشت گردوں نے مسافروں کو تین گروپوں میں تقسیم کر رکھا تھا۔ مرحلہ وار کارروائی کرتے ہوئے تمام مسافروں کو بحفاظت نکال لیا گیا۔

33 دہشت گرد ہلاک، 21 معصوم شہری شہید

لیفٹیننٹ جنرل احمد شریف نے بتایا کہ آپریشن کے دوران تمام 33 دہشت گرد مارے گئے۔ افسوسناک طور پر 21 معصوم افراد کو دہشت گردوں نے شہید کر دیا تھا، جن میں 4 ایف سی کے جوان بھی شامل ہیں۔

دہشت گردوں کا کوئی تعلق اسلام یا بلوچستان سے نہیں: ڈی جی آئی ایس پی آر

ڈی جی آئی ایس پی آر نے واضح کیا کہ دہشت گردوں کا دین اسلام اور بلوچستان سے کوئی تعلق نہیں۔ یہ دہشت گرد بیرونی آقاؤں کے ایما پر کام کر رہے ہیں۔ ان کے گٹھ جوڑ کی مثال کلبھوشن یادیو کے کیس سے بھی دی جا سکتی ہے۔

دہشت گردوں کو عبرتناک انجام تک پہنچائیں گے

لیفٹیننٹ جنرل احمد شریف نے کہا کہ “کوئی بھی دہشت گرد معصوم شہریوں کو نشانہ بنائے گا تو اسے ہنٹ کیا جائے گا، عبرتناک انجام تک پہنچایا جائے گا”۔

آپریشن میں حصہ لینے والے مسافروں کی تفصیل

ڈی جی آئی ایس پی آر نے بتایا کہ

190 مسافر بازیاب (58 مرد، 31 خواتین، 15 بچے)

37 زخمی مسافر ہسپتال منتقل

57 مسافر کوئٹہ منتقل

23 مسافر مچھ اور آب گم منتقل

آپریشن کے دوران احتیاط: کوئی مسافر زخمی نہیں ہوا

لیفٹیننٹ جنرل احمد شریف کے مطابق، فائنل آپریشن میں کسی بھی مسافر یا سیکیورٹی اہلکار کو کوئی نقصان نہیں پہنچا۔ آپریشن پروفیشنل اور بڑی حکمت عملی سے مکمل کیا گیا۔

سیاسی عناصر کی تنقید پر ردعمل

ڈی جی آئی ایس پی آر نے کچھ سیاسی عناصر کی تنقید پر کہا کہ “افسوس ہوتا ہے کہ کچھ لوگ اقتدار کی ہوس میں قومی مفاد کو بھی نقصان پہنچا رہے ہیں”۔ عوام ان چہروں کو پہچانتی ہے جو انتشاری سیاست کو فروغ دے رہے ہیں۔

وزیراعظم، صدر، اور اعلیٰ قیادت کی مذمت

وزیراعظم شہباز شریف، صدر آصف زرداری، اسپیکر قومی اسمبلی، چیئرمین سینیٹ اور دیگر سیاسی و عسکری قیادت نے جعفر ایکسپریس پر حملے کی شدید مذمت کی ہے اور شہداء کو خراج تحسین پیش کیا ہے۔