بنوں کینٹ پر دہشت گرد حملے کی کوشش ناکام، 16 حملہ آور ہلاک

بنوں: پاک فوج کے شعبہ تعلقات عامہ (آئی ایس پی آر) کے مطابق 4 مارچ کو خوارج عناصر نے بنوں کینٹ پر دہشت گرد حملے کی بزدلانہ کوشش کی، جسے سکیورٹی فورسز نے فوری اور فیصلہ کن کارروائی کے ذریعے ناکام بنا دیا۔

بیان کے مطابق حملہ آوروں نے دو بارود سے بھری گاڑیاں حفاظتی دیوار سے ٹکرا دیں، تاہم پاک فوج کے مستعد جوانوں نے جرات اور پیشہ ورانہ مہارت کا مظاہرہ کرتے ہوئے دہشت گردوں کو نشانہ بنایا۔ اس کارروائی میں 16 دہشت گرد مارے گئے، جن میں 4 خودکش بمبار بھی شامل تھے۔

5 فوجی شہید، 13 شہری جاں بحق

آئی ایس پی آر نے بتایا کہ اس شدید جھڑپ میں 5 بہادر فوجی مادر وطن پر قربان ہو گئے، جبکہ خودکش دھماکوں کے باعث حفاظتی دیوار کا کچھ حصہ منہدم ہو گیا، جس سے قریبی عمارتوں کو نقصان پہنچا۔

بدقسمتی سے ایک مسجد اور رہائشی عمارت بھی تباہ ہو گئی، جس کے نتیجے میں 13 بے گناہ شہری شہید جبکہ 32 زخمی ہو گئے۔ زخمیوں کو فوری طور پر قریبی اسپتال منتقل کر دیا گیا، جہاں انہیں طبی امداد دی جا رہی ہے۔

حملے میں افغان شہری ملوث، منصوبہ بندی افغانستان میں ہوئی

آئی ایس پی آر کے مطابق خفیہ اداروں کی تحقیقات میں واضح طور پر ثابت ہوا ہے کہ اس حملے میں افغان شہری براہ راست ملوث تھے۔ شواہد کے مطابق حملے کی منصوبہ بندی اور نگرانی افغانستان میں موجود خوارج کے سرغنہ کر رہے تھے۔

ترجمان پاک فوج نے مطالبہ کیا کہ عبوری افغان حکومت اپنی ذمہ داریوں کو پورا کرے اور اپنی سرزمین کو پاکستان کے خلاف دہشت گردی کے لیے استعمال نہ ہونے دے۔ پاکستان اپنی سرحدوں کے پار سے ہونے والے خطرات کے جواب میں ہر ممکن اقدامات کرنے کا حق محفوظ رکھتا ہے۔

دہشت گردی کے خاتمے کے عزم کا اعادہ

آئی ایس پی آر کے مطابق پاکستانی سکیورٹی فورسز دہشت گردی کے مکمل خاتمے کے عزم پر قائم ہیں۔ ہمارے بہادر فوجیوں اور بے گناہ شہریوں کی قربانیاں اس غیر متزلزل عزم کو مزید مضبوط کرتی ہیں۔ پاک فوج اپنی سرزمین کی حفاظت کے لیے ہر قیمت چکانے کو تیار ہے۔