عمران خان کشمیر کا سفیر بنتے بنتے بھارتی جاسوس کلبھوشن کے وکیل بن گئے، بلاول بھٹو

پاکستان پیپلز پارٹی کے چیئرمین بلاول بھٹو زرداری نے کہا کہ  وزیراعظم عمران خان کشمیر کا سفیر بنتے بنتے اب بھارتی جاسوس اور دہشتگرد کلبھوشن یادیو کے وکیل بن گئے ہیں۔

آزاد کشمیر کے علاقے ہجیرہ میں عوامی جلسے سے خطاب کرتے ہوئے بلاول بھٹو زرداری نے کہا کہ پیپلز پارٹی اور کشمیریوں کا رشتہ 3 نسلوں کا ہے، کشمیریوں نے ذوالفقارعلی بھٹو اور بے نظیر بھٹو کا ساتھ دیا اور انہوں نے آپ کا ساتھ دیا، پیپلزپارٹی نے آزاد کشمیرمیں جمہوریت اور پارلیمانی نظام کی بنیاد رکھی، آزاد کشمیر کے عوام عمران خان کی مہنگائی اور بےروزگاری کا مقابلہ کررہے ہیں۔

چیئرمین پیپلز پارٹی نے کہا کہ مقبوضہ کشمیر میں حملہ ہوتا ہے تو عمران خان کہتا ہے میں کیا کروں، مقبوضہ کشمیرمیں مودی حکومت ظلم کررہی ہے۔ کٹھ پتلی نے کشمیر ہائی وے کا نام سری نگر ہائی وے رکھ دیا، یہ ان کا جواب ہے۔ کشمیریوں کے ساتھ یکجہتی کا اظہار جمعہ والے دن بھی صرف ایک ہفتہ کیا، اس کٹھ پتلی نے کشمیر کا سودا کر لیا ہے، کشمیر کے فیصلے کشمیری عوام نہیں بلکہ کٹھ پتلی کررہے ہیں۔

بلاول بھٹو زرداری کا کہنا تھا کہ کٹھ پتلی وزیراعظم کی ڈکٹیشن پر نہیں چلیں گے، کشمیر کا سفیر بنتے بنتے عمران خان اب بھارتی دہشت گرد جاسوس کلبھوشن یادیو کا وکیل بن چکا ہے، کلبھوشن کو این آر او دینے کے لئے آرڈیننس لایا گیا، بھارتی جاسوس نے آرڈیننس کا فائدہ نہیں لیا تو پارلیمان میں آگئے،  اگر عمران خان نے کلبھوشن کو این آر او دینا ہے تو ہم اس کا ساتھ نہیں دیں گے۔

چیئرمین پیپلز پارٹی کا کہنا ہے کہ ہمارا نعرہ رائے شماری کا ہے، کشمیر سے متعلق فیصلے صرف کشمیری عوام کریں گے، کشمیر کے عوام پاکستان پیپلز پارٹی کا وزیراعظم منتخب کریں گے۔