بجٹ کے ذریعے عمران خان کا غریب دشمن اورعوام دشمن ایجنڈا واضح ہوگیا، بلاول بھٹو

پاکستان پیپلزپارٹی کے چیئرمین بلاول بھٹو زرداری نے آئندہ مالی سال کے بجٹ کو عوام پر معاشی حملہ قرار دے دیا، کہتے ہیں کہ بجٹ کے ذریعے عمران خان کا غریب دشمن اور عوام دشمن ایجنڈا واضح ہو گیا۔

بلاول بھٹو زرداری نے اپنے ایک بیان میں کہا ہے کہ سال بدل گیا مگر غریب عوام کے حالات نہیں بدلے، بجٹ آگیا مگر غریبوں کے گھر کا چولہا اب بھی بجھا ہے، اگرمہنگائی تاریخی ہے، بیروزگاری تاریخی ہے، غربت تاریخی ہے تو بجٹ کیسے عوامی ہوسکتا ہے۔

چیئرمین پیپلز پارٹی کا کہنا تھا کہ جب پی ٹی آئی اپنا عوام دشمن بجٹ پیش کررہی تھی تو پارلیمان کے باہر سرکاری ملازمین مہنگائی کی دہائیاں دے رہے تھے، عوام جان چکے ہیں کہ بڑی بڑی باتیں کرنا عمران خان کی عادت ہے۔

بلاول بھٹو زرداری نے کہا ہے کہ وزیراعظم عام آدمی کو ریلیف فراہم کرنے میں مکمل ناکام ہوچکے، بجٹ پیش کرکے عمران خان نے اپنا غریب دشمن اور عوام دشمن ایجنڈا واضح کردیا، پاکستان پیپلزپارٹی عمران خان کو عوام کے معاشی قتل عام کی اجازت نہیں دے گی۔