محسن نقوی سے برطانوی ہائی کمشنر کی ملاقات، پاک برطانیہ تعلقات اور تعاون بڑھانے پر اتفاق

وفاقی وزیر داخلہ محسن نقوی سے برطانوی ہائی کمشنر جین میریٹ نے ملاقات کی، جس میں پاک برطانیہ تعلقات اور مختلف شعبوں میں دوطرفہ تعاون بڑھانے پر تبادلہ خیال کیا گیا۔

ملاقات میں خاص طور پر انسداد دہشت گردی، انسداد منشیات، بارڈر سکیورٹی اور انسانی سمگلنگ کے حوالے سے تعاون کو مزید فروغ دینے پر زور دیا گیا۔

برطانوی ہائی کمشنر کے تاثرات

برطانوی ہائی کمشنر جین میریٹ نے وزیر داخلہ محسن نقوی کو نشان امتیاز ملنے پر مبارکباد دی اور نیک خواہشات کا اظہار کیا۔ انہوں نے پاکستان میں حالیہ بارشوں اور سیلاب کے باعث قیمتی انسانی جانوں کے ضیاع پر افسوس کا اظہار کرتے ہوئے جاں بحق افراد کے خاندانوں سے دلی ہمدردی اور تعزیت بھی کی۔

محسن نقوی کا موقف

وفاقی وزیر داخلہ محسن نقوی نے کہا کہ پاکستان ہمیشہ سے امن کا داعی رہا ہے اور دہشت گردی کی ہر شکل کی سخت مذمت کرتا ہے۔

انہوں نے اس بات پر زور دیا کہ برطانیہ پاکستان کے ترقی کے سفر میں ایک اہم شراکت دار ہے اور حکومت پاکستان باہمی مفاد کے تمام شعبوں میں برطانیہ کے ساتھ دوطرفہ تعاون کو مزید مستحکم کرنا چاہتی ہے۔