یومِ دفاع و شہداء پر ملک بھر میں تقاریب، شہداء کو خراجِ عقیدت

یومِ دفاع و شہداء کے موقع پر ملک بھر میں جنرل ہیڈ کوارٹرز سمیت مختلف گیریژنز میں شاندار تقاریب کا انعقاد کیا جا رہا ہے، جن میں پاک فوج کے افسران، جوانوں، اعلیٰ سول و عسکری حکام اور شہداء کے لواحقین کی بڑی تعداد شریک ہے۔

جنرل ہیڈکوارٹرز میں مرکزی تقریب

جنرل ہیڈکوارٹرز (جی ایچ کیو) راولپنڈی میں یادگارِ شہداء پر مرکزی تقریب منعقد ہوئی۔ چیف آف جنرل اسٹاف نے شہداء کی یادگار پر پھول چڑھائے اور ایصالِ ثواب کے لیے فاتحہ خوانی کی۔ اس موقع پر شرکاء نے وطن کی حفاظت کے لیے اپنی جانوں کا نذرانہ پیش کرنے والے شہداء کو سلام عقیدت پیش کیا۔

ملک بھر میں تقاریب

راولپنڈی، ملتان، کوئٹہ اور کھاریاں کے گیریژنز میں بھی یادگارِ شہداء پر تقاریب ہوئیں، جہاں پاک فوج کے اعلیٰ حکام نے پھولوں کی چادریں چڑھائیں اور شہداء کے ایصالِ ثواب کے لیے فاتحہ خوانی کی۔ ان تقریبات میں افسران، جوانوں اور شہداء کے لواحقین کی بڑی تعداد موجود رہی، جنہوں نے غازیوں اور شہداء کی لازوال قربانیوں کو یاد کیا۔

شرکاء کا عزم

تقریبات کے شرکاء نے کہا کہ 6 ستمبر پاکستان کی تاریخ کا ایک سنہرا باب ہے، یہ دن مادرِ وطن کے دفاع میں جان نثار کرنے والے شہداء کی یاد دلاتا ہے۔ انہوں نے کہا کہ پاکستان کی افواج اور قوم نے ہمیشہ دشمن کی عددی برتری کے باوجود غیر متزلزل عزم اور بہادری کا مظاہرہ کیا اور دشمن کے ناپاک عزائم کو خاک میں ملا دیا۔

کوئٹہ گیریژن میں خصوصی تقریب

کوئٹہ گیریژن میں ہونے والی تقریب میں وزیراعلیٰ بلوچستان مہمانِ خصوصی اور گورنر بلوچستان مہمانِ اعزاز تھے، جبکہ کور کمانڈر بلوچستان بھی ان کے ہمراہ تھے۔ وزیراعلیٰ بلوچستان نے یادگارِ شہداء پر پھول چڑھائے اور فاتحہ خوانی کی۔ اس موقع پر اعلیٰ سول و عسکری حکام، جوانوں اور شہداء کے لواحقین کی بڑی تعداد نے شرکت کی۔ شرکاء نے شہداء اور غازیوں کی قربانیوں کو خراجِ تحسین پیش کیا اور ان کے جذبے کو پاکستان کی اصل طاقت قرار دیا۔