عالمی سربراہان پارلیمنٹ مسجد اقصیٰ پراسرائیلی حملے کا نوٹس لیں، چیئرمین سینیٹ

چیئرمین سینیٹ صادق سنجرانی نے مسجد اقصیٰ پر اسرائیلی فوج کے حملے کی پرزور مذمت کرتے ہوئے مختلف ممالک کے پارلیمانی سربراہان سے معاملے کا نوٹس لینے کا مطالبہ کیا ہے۔

چیئرمین سینٹ صادق سنجرانی نے امریکا، برطانیہ سمیت مختلف ممالک کے پارلیمانی سربراہان کو خطوط ارسال کیے ہیں جن میں مسجد اقصیٰ میں فلسطینی شہریوں پر اسرائیلی فوجیوں کے تشدد پر سخت تشویش کا اظہار کیا گیا ہے۔

چیئرمین سینیٹ نے خطوط میں لکھا ہے کہ پاکستانی عوام کے جذبات کی ترجمانی کرتے ہوئے پارلیمنٹ کے سربراہان کی توجہ ماضی قریب میں مسجد اقصی میں نمازیوں پر حملے کی توجہ دلاتا ہوں، مسجد اقصیٰ دنیا بھر کے مسلمانوں کے لئے مقدس جگہ ہے، اسرائیلی اقدام سے تمام انسانی اقدار اور بین الاقوامی قانون کی دھجیاں بکھیردی گئیں۔

صادق سنجرانی کا کہنا ہے کہ رمضان میں اسرائیلی افواج کا نمازیوں پرحملہ انسانی حقوق اور عالمی قوانین کے منافی ہے، مسجد اقصیٰ میں نمازیوں پرظلم و بربریت کسی مذہب کے لیے قابل قبول نہیں، عالمی سربراہان پارلیمنٹ اس ظالمانہ اقدام کی مذمت کریں، اور فلسطین میں انسانی حقوق کی خلاف ورزیوں کےخاتمےمیں کردارادا کریں۔