وزیراعلیٰ مریم نواز کی یوم پاکستان پر قوم کو مبارکباد، شہداء کی قربانیوں کو خراج تحسین

وزیراعلیٰ پنجاب مریم نواز نے یوم پاکستان کے موقع پر پوری قوم کو مبارکباد دیتے ہوئے بانیانِ پاکستان کی جدوجہد اور شہداء کی قربانیوں کو زبردست خراج تحسین پیش کیا۔

اپنے خصوصی پیغام میں وزیراعلیٰ نے کہا کہ 23 مارچ ہمیں قیام پاکستان کے سنہری مقاصد کی یاد دلاتا ہے۔ انہوں نے کہا کہ اللہ تعالیٰ کے فضل و کرم سے پاکستان وجود میں آیا اور ہمیشہ قائم و دائم رہے گا۔ پاکستان کو دنیا کی پہلی اسلامی ایٹمی طاقت بننے کا منفرد اعزاز بھی حاصل ہے، جو پوری قوم کے لیے باعث فخر ہے۔

یوم پاکستان اتحاد و یکجہتی کی تجدید کا دن

وزیراعلیٰ مریم نواز نے کہا کہ یوم پاکستان ہمیں جدوجہد آزادی کے بنیادی اصولوں کی یاد دلاتا ہے اور اس دن ہمیں اپنے ملک کی خودمختاری، سالمیت اور استحکام کے عہد کو دہرانا چاہیے۔ انہوں نے کہا کہ یہ دن ہمیں اتحاد، ایمان اور نظم و ضبط جیسے اصولوں کو اپنانے کی ترغیب دیتا ہے، جو ایک کامیاب قوم کے لیے ناگزیر ہیں۔

معاشرتی ترقی اور خوشحالی کا عزم

وزیراعلیٰ پنجاب نے کہا کہ آج کے دن ہمیں غربت کے خاتمے، معاشرتی ناہمواریوں کے سدباب اور کمزور طبقات کے تحفظ کا عہد کرنا چاہیے۔ انہوں نے اس عزم کا اظہار کیا کہ پنجاب کو قائداعظم اور بانیان پاکستان کے وژن کے مطابق ترقی کی نئی بلندیوں پر پہنچایا جائے گا۔

تعلیم، صحت اور زراعت میں جدت کا عزم

وزیراعلیٰ مریم نواز نے مزید کہا کہ یوم پاکستان پر ہم تعلیم، صحت اور زراعت کے شعبے میں جدت لانے کا عہد کرتے ہیں۔ انہوں نے اس عزم کا اعادہ کیا کہ پنجاب کو پاکستان کی معیشت کا انجن اور ترقی کا مرکز بنایا جائے گا تاکہ ملک خوشحالی کی راہ پر گامزن ہو۔

قوم کو یوم پاکستان کی مبارکباد

وزیراعلیٰ مریم نواز نے اپنے پیغام کے اختتام پر کہا کہ ہمیں اپنی ذمہ داریوں کا احساس کرتے ہوئے پاکستان کی ترقی اور استحکام کے لیے بھرپور محنت کرنی ہوگی۔