سکردو میں کلاؤڈ برسٹ سے شدید تباہی، درجنوں مکانات اور دکانیں تباہ، ایک لڑکی جاں بحق

گلگت بلتستان کے ضلع سکردو کے علاقے کندوس میں کلاؤڈ برسٹ کے نتیجے میں آنے والے شدید سیلاب نے بڑے پیمانے پر تباہی مچا دی ہے۔ مقامی ذرائع کے مطابق 49 مکانات، 20 دکانیں اور دو مساجد مکمل طور پر منہدم ہو چکی ہیں جبکہ درجنوں سیاح اور مقامی افراد پھنس کر رہ گئے ہیں۔

سیلابی ریلے نے نہ صرف املاک کو تباہ کیا بلکہ رابطہ پل بھی بہا کر لے گیا، جس کے باعث علاقے کا زمینی رابطہ منقطع ہو گیا ہے۔ مواصلاتی نظام مکمل طور پر متاثر ہوا ہے اور امدادی کارروائیوں میں شدید رکاوٹوں کا سامنا ہے۔

ڈغونی میں ایک لڑکی جاں بحق

اسی دوران سب ڈویژن ڈغونی میں بھی شدید بارش کے باعث ایک مکان کی چھت گر گئی جس کے نتیجے میں ایک کم عمر لڑکی ملبے تلے دب کر جاں بحق ہو گئی۔ علاقے میں ریسکیو آپریشن جاری ہیں لیکن دشوار گزار راستوں اور تباہ شدہ انفراسٹرکچر کے باعث امدادی کارروائیاں سست روی کا شکار ہیں۔

دیامر میں پہلے ہی قیامت خیز مناظر

یہ حادثہ دو روز قبل ضلع دیامر میں پیش آنے والی آفت کے فوراً بعد پیش آیا ہے، جہاں کلاؤڈ برسٹ کے بعد آنے والے سیلاب اور لینڈ سلائیڈنگ نے تباہی مچائی تھی۔ اس واقعے میں لودھراں سے تعلق رکھنے والے ڈاکٹر، ان کے دیور اور سسر جاں بحق ہو گئے تھے جبکہ ان کا بیٹا تاحال لاپتا ہے۔

امدادی ٹیموں نے فوری کارروائی کرتے ہوئے 200 سے زائد سیاحوں کو ریسکیو کر کے چلاس منتقل کیا تھا۔ دیامر میں 8 کلومیٹر طویل رابطہ سڑک بھی لینڈ سلائیڈنگ کی نذر ہو چکی ہے۔

—

این ڈی ایم اے رپورٹ: ملک بھر میں اموات 252 تک جا پہنچیں

نیشنل ڈیزاسٹر مینجمنٹ اتھارٹی (NDMA) کی جاری کردہ تازہ رپورٹ کے مطابق حالیہ بارشوں اور قدرتی آفات کے نتیجے میں ملک بھر میں اموات کی مجموعی تعداد 252 ہو چکی ہے۔ ان میں:

121 بچے

85 مرد

46 خواتین شامل ہیں۔

گزشتہ 24 گھنٹوں کے دوران مزید 10 افراد جاں بحق اور 13 زخمی ہوئے۔

صوبہ وار تفصیلات:

پنجاب: 139 اموات

خیبرپختونخوا: 60 اموات

سندھ: 24 اموات

بلوچستان: 16 اموات

این ڈی ایم اے نے ممکنہ مزید بارشوں کے پیش نظر ریڈ الرٹ جاری کر دیا ہے اور متعلقہ اداروں کو فوری اقدامات کی ہدایت کی گئی ہے۔