پاکستان میں کوروناکے وار۔۔۔ ایک دن میں 113 اموات،3 ہزار84 کیسز رپورٹ

پاکستان میں کورونا وائرس کے وار کم نہ ہو سکے، گزشتہ ایک دن میں قاتل وائرس نے مزید 113 زندگیوں کے چراغ گل کر دیئے، جب کہ ملک میں 3 ہزار سے زائد نئے کیسز رپورٹ ہوئے ہیں۔

نیشنل کمانڈ اینڈ آپریشن سینٹر کی جانب سے جاری اعداد و شمار کے مطابق گزشتہ 24 گھنٹوں کے دوران 38 ہزار 883 افراد کے کورونا ٹیسٹ کیے گئے جن میں سے تین ہزار 84 افراد میں وائرس کی تصدیق ہوئی۔ جس کے بعد ملک میں کورونا کیسز کی مجموعی تعداد 8 لاکھ 64 ہزار 557 تک پہنچ گئی۔

این سی او سی کے مطابق پنجاب میں 3 لاکھ 20 ہزار 851، سندھ میں 2 لاکھ 93 ہزار 426 کورونا کیسز رپورٹ ہو چکے ہیں،خیبرپختونخوا میں 1 لاکھ  24 ہزار979، بلوچستان میں 23 ہزار 534، اسلام آباد میں 78 ہزار 382، آزادکشمیر میں 17 ہزار 984 اور گلگت بلتستان میں 5 ہزار 401 کورونا کیسز سامنے آ چکے ہیں۔

این سی او سی حکام کا کہنا ہے کہ گزشتہ روز قاتل وباء مزید 113 انسانی زندگیوں کو نگل گئی،  جس کے بعد ملک بھر میں کورونا سے ہونے والی اموات کی مجموعی تعداد 19 ہزار 106 تک پہنچ گئی ہے، گزشتہ 24 گھنٹوں میں مثبت کیسز کی شرح 7.93 فیصد رہی،ملک میں ایکٹو کیسز کی تعداد 78 ہزار 959 ہے، اس وقت 607 مریض  وینٹلیٹرزپر ہیں۔5 ہزار353 مریض مختلف اسپتالوں میں زیرعلاج ہیں۔7لاکھ 66 ہزار 492 مریض مکمل طور پر صحتیاب ہوچکے ہیں۔