ولی عہد محمد بن سلمان کا پاکستان-بھارت جنگ بندی کا خیرمقدم، خطے میں امن کی حمایت

ریاض میں ہونے والے خلیج تعاون کونسل-امریکہ سربراہی اجلاس سے خطاب کرتے ہوئے سعودی عرب کے ولی عہد شہزادہ محمد بن سلمان نے پاکستان اور بھارت کے درمیان جنگ بندی کے معاہدے کا خیرمقدم کیا۔ انہوں نے کہا کہ یہ اقدام جنوبی ایشیا میں کشیدگی کم کرنے اور امن بحال کرنے میں اہم کردار ادا کرے گا۔

شہزادہ محمد بن سلمان نے امریکی صدر ڈونلڈ ٹرمپ کی سفارتی کوششوں کو بھی سراہا، جو کہ دونوں ممالک کو مذاکرات کی میز پر لانے اور تصادم سے بچانے کے لیے کی گئی تھیں۔ انہوں نے کہا کہ سعودی عرب خطے میں امن کے فروغ کے لیے ہر ممکن تعاون فراہم کرے گا۔

ان کا کہنا تھا:

> “ہم پاکستان اور انڈیا کے درمیان جنگ بندی کے معاہدے کا خیرمقدم کرتے ہیں اور امید کرتے ہیں کہ اس سے دونوں ممالک کے درمیان کشیدگی پر قابو پانے اور امن بحال کرنے میں مدد ملے گی۔”

اس موقع پر انہوں نے امریکہ کی جانب سے شام پر سے پابندیاں ہٹانے کے فیصلے کی بھی تعریف کی اور اسے مشرق وسطیٰ میں استحکام کے لیے مثبت قدم قرار دیا۔

اجلاس کے دوران سعودی ولی عہد نے خطے میں دیرینہ تنازعات کے پائیدار اور پرامن حل پر زور دیا اور عالمی برادری سے مطالبہ کیا کہ وہ جنوبی ایشیا میں دیرپا امن کے قیام کے لیے اپنا کردار ادا کرے۔