ملک میں بجلی کا شارٹ فال 6 ہزار 576 میگاواٹ، بدترین لوڈشیڈنگ جاری

ملک میں بجلی کی کل طلب 26 ہزار 500 میگاواٹ اور مجموعی پیداوار 19 ہزار 924 میگاواٹ ہونے سے شارٹ فال 6 ہزار 576 میگاواٹ تک پہنچ گیا، بدترین لوڈشیڈنگ جاری

پاور ڈویژن کے ذرائع کا کہنا ہے کہ ملک میں اس وقت بجلی کی مجموعی پیداوار 19 ہزار 924 میگاواٹ ہے، جب کہ بجلی کی کل طلب 26 ہزار 500 میگاواٹ ہے، جس کے باعث ملک کے مختلف علاقوں میں 14 گھنٹے تک کی  اعلانیہ و غیر اعلانیہ لوڈشیڈنگ جاری ہے، جب کہ زیادہ نقصانات والے علاقوں میں لوڈشیڈنگ کا دورانیہ اس سے بھی زیادہ ہے۔سخت گرمی اور طویل ترین لوڈشیڈنگ کے باعث عوام بلبلا اٹھے ہیں۔

ذرائع کے مطابق پانی سے 5 ہزار 219میگاواٹ بجلی پیدا کی جارہی ہے، سرکاری تھرمل پلانٹس 1 ہزار 284میگاواٹ بجلی پیدا کررہے ہیں،  نجی شعبے کے بجلی گھروں کی مجموعی پیداوار 9 ہزار 764 میگاواٹ ہے، ونڈ پاور پلانٹس 1ہزار 190 میگاواٹ اور سولرپلانٹس سے پیداوار صفر ہے، بگاس سے چلنے والے پلانٹس 189 میگاواٹ بجلی پیدا کررہے ہیں،  جوہری ایندھن 2ہزار 278 میگاواٹ بجلی پیدا کی جارہی ہے۔ آئیسکو کو بھی 450 میگاواٹ شارٹ فال کا سامنا ہے، اور اسلام آباد ریجن میں بھی 6 گھنٹے تک لوڈ شیڈنگ کی جا رہی ہے۔