پاکستان اور افغانستان کی جنگ ختم کرنا میرے لیے بہت آسان ہے:صدرٹرمپ

امریکی صدر ڈونلڈ ٹرمپ نے کہا ہے کہ پاکستان اور افغانستان کے درمیان جاری کشیدگی کو ختم کرنا ان کے لیے بالکل آسان ہے۔ صدر ٹرمپ نے اوول آفس میں صحافیوں سے گفتگو کے دوران کہا کہ انہیں جنگیں روکنا پسند ہے اور وہ دونوں ممالک کے درمیان قیامِ امن کے خواہاں ہیں۔

اوول آفس میں صحافیوں سے گفتگو
صدر ٹرمپ نے کہا کہ انہیں پاکستان اور افغانستان کی سرحدی صورتحال اور حالیہ جھڑپوں سے مکمل آگاہی ہے۔ انہوں نے دعویٰ کیا کہ اگر وہ چاہیں تو پاکستان اور افغانستان کے درمیان یہ جنگ فوری طور پر ختم کروا سکتے ہیں۔

پاک بھارت جنگ بندی کا ذکر
امریکی صدر نے گفتگو کے دوران ایک بار پھر پاک بھارت تعلقات اور جنگ بندی کے عمل کا ذکر کرتے ہوئے کہا کہ پاکستان کے وزیراعظم شہباز شریف نے ان سے کہا تھا کہ “آپ نے پاک بھارت جنگ روک کر لاکھوں جانیں بچائیں۔” صدر ٹرمپ نے اسے اپنی بڑی کامیابی قرار دیا۔

پاکستان اور افغانستان کے درمیان عارضی جنگ بندی
گزشتہ دنوں افغانستان میں طالبان اور فتنہ الخوارج کے ٹھکانوں پر پاکستان کی ٹارگٹڈ کارروائیوں میں درجنوں ہلاکتوں کے بعد افغان طالبان کی درخواست پر پاکستان نے شام 6 بجے سے اگلے 48 گھنٹوں کے لیے عارضی سیز فائر کا فیصلہ کیا تھا۔

دوحہ مذاکرات تک جنگ بندی میں توسیع
ذرائع کے مطابق ابتدائی 48 گھنٹے کی فائر بندی کے بعد دونوں ممالک کے درمیان کشیدگی میں کمی آئی ہے اور اب جنگ بندی میں مزید توسیع کر دی گئی ہے۔ برطانوی خبر ایجنسی کے مطابق یہ فیصلہ دوحہ میں جاری پاکستان اور افغان طالبان کے مذاکرات کی تکمیل تک جاری رہے گا۔