فواد چوہدری کا پاکستان اور جرمنی کے درمیان ثقافتی تعاون بڑھانے کی ضرورت پر زور

وفاقی وزیراطلاعات فواد چوہدری نے پاکستان اور جرمنی کے درمیان ثقافتی شعبے میں تعاون بڑھانے کی ضرورت پر زور دیتے ہوئے کہا ہے کہ جرمنی کے فلم ساز اور ڈرامہ پروڈیوسرز پاکستان آئیں اور ہمالیہ کی خوبصورتی دریافت کریں۔

وفاقی وزیراطلاعات و نشریات چوہدری فواد حسین سے جرمنی کے سفیر برن ہارڈ سٹیفن شلیگ ہیک نے ملاقات کی۔ ملاقات میں باہمی دلچسپی، دوطرفہ تعلقات کے فروغ کے حوالے سے تبادلہ خیال کیا گیا، فلم اور ڈرامہ کے شعبوں میں پاکستان اور جرمنی کے درمیان مشترکہ منصوبوں کی ضرورت پر زور دیا گیا۔

وزیراطلاعات نے کہا کہ جرمنی کے فلم ساز اور ڈرامہ پروڈیوسرز پاکستان آئیں اور ہمالیہ کی خوبصورتی دریافت کریں۔ جرمنی کی فلم اور ڈرامہ پروڈیوسرز ایسوسی ایشنز کے ساتھ زوم میٹنگ کا انعقاد ہونا چاہئے۔ پاک جرمنی تعلقات مشترکہ جمہوری اقدار اور کثیر الجہتی تعاون پر مبنی ہیں۔

اس موقع پر جرمن سفیر برن ہارڈ سٹیفن شلیگ ہیک نے کہا جوائنٹ وینچرز سے سیاحت اور علاقے کی خوبصورتی کو فروغ دینے میں مدد ملے گی۔صحافیوں کے تحفظ کے بل کو حتمی شکل دینے کیلئے موجودہ جمہوری حکومت کی کاوشیں قابل تحسین ہیں۔

وفاقی وزیر برائے اطلاعات و نشریات فواد چوہدری نے مغرب میں اسلامو فوبیا کے بڑھتے ہوئے رجحان پر اپنی تشویش کا اظہار کیا اور کہا کہ نفرت انگیز تقاریر عالمگیر سطح پر تسلیم شدہ حقیقت ہیں۔ تمام ممالک کی یہ ذمہ داری بنتی ہے کہ وہ نفرت انگیز تقاریر کی اجازت نہ دیں۔