وفاقی حکومت کا دہشتگردی کی ہر شکل کو جڑ سے اکھاڑ پھینکنے کے عزم کا اعادہ

وزیراعظم شہباز شریف کی زیر صدارت وفاقی کابینہ کا اجلاس منعقد ہوا، جس میں ملکی، علاقائی اور عالمی امور پر تفصیلی غور کیا گیا۔ اجلاس میں وزیراعظم نے اپنے بیرونی دوروں، عالمی رہنماؤں سے ملاقاتوں اور موجودہ علاقائی صورتحال پر کابینہ کو اعتماد میں لیا۔

داخلی و خارجی صورتحال پر بریفنگ
ذرائع کے مطابق وزیراعظم نے کابینہ کو داخلی حالات، سکیورٹی چیلنجز اور بین الاقوامی سطح پر پاکستان کی سفارتی کامیابیوں سے آگاہ کیا۔ اجلاس میں افغانستان سے درپیش خطرات، فتنہ الہندوستان کی شرانگیزیوں اور خوارج کی کارروائیوں کا بھی تفصیلی جائزہ لیا گیا۔

دہشتگردی کے خلاف عزم
وفاقی کابینہ نے دہشتگردی کے خلاف جنگ میں جامِ شہادت نوش کرنے والے افواجِ پاکستان کے بہادر جوانوں کو خراجِ عقیدت پیش کیا۔ ارکانِ کابینہ نے شہداء کے اہل خانہ سے مکمل یکجہتی کا اظہار کرتے ہوئے دہشتگردی کی ہر شکل کو جڑ سے اکھاڑ پھینکنے کے عزم کا اعادہ کیا۔

معاشی و تجارتی امور پر فیصلے
اجلاس میں بین الحکومتی تجارتی معاملات سے متعلق کابینہ کمیٹی کے فیصلوں کی توثیق کی گئی۔ اوورسیز امپلائمنٹ، ٹیکنیکل اور وکیشنل ایجوکیشن و ٹریننگ سے متعلق ایجنڈا بھی زیر غور آیا۔

قانون سازی اور اصلاحات
ذرائع کے مطابق قانون سازی سے متعلق کابینہ کمیٹی کی تین مختلف تاریخوں پر ہونے والی میٹنگز کے فیصلوں کی بھی منظوری دی گئی۔ ریگولیٹری ریفارمز سے متعلق کابینہ کمیٹی کی سفارشات کا تفصیلی جائزہ لیا گیا۔

پاور سیکٹر اصلاحات پر رپورٹ
وزارت توانائی کی جانب سے پاور سیکٹر میں اصلاحات سے متعلق تفصیلی رپورٹ اجلاس میں پیش کی گئی، جس پر کابینہ نے اطمینان کا اظہار کیا اور متعلقہ وزارت کو مزید بہتری کے لیے ہدایات دیں۔