ایف آئی اے نے صدر مسلم لیگ (ن) شہباز شریف کو 22 جون کو طلب کرلیا

فیڈرل انوسٹی گیشن ایجنسی (ایف آئی اے) نے قومی اسمبلی میں اپوزیشن لیڈر میاں شہباز شریف کو رمضان شوگر ملز اور منی لانڈرنگ کیس میں طلب کرلیا۔

ایف آئی اے اینٹی کرپشن سرکل نے 22 جون کو میاں شہباز شریف کو ذاتی حیثیت میں پیش ہونے کی ہدایت کی ہے اس حوالے سے دستاویزات ساتھ لانے کو کہا ہے۔ شہباز شریف پر رمضان شوگر ملز اور العربیہ شوگر ملز کے ذریعے منی لانڈرنگ کا الزام ہے۔

صدر مسلم لیگ (ن) شہباز شریف اور ان کے اہلخانہ پر25 ارب روپے کی منی لانڈرنگ، چینی کی ذخیرہ اندوزی اور سٹہ بازی جیسے الزامات ہیں۔ نوٹس میں کہا گیا ہے کہ دو دفعہ سوالنامہ بھجوایا گیا مگر جواب نہیں دیا۔ دسمبر 2020 میں ایف آئی اے کی ٹیم نے 5 سوالوں پرمشتمل سوالنامہ دیا تھا، پھر جنوری 2021 میں آپ کو یاد دہانی کرائی گئی۔

نوٹس میں شہباز شریف کو مخاطب کرتے ہوئے لکھا گیا ہے کہ آپ نے کہا کہ عطا تارڑ آپ کے جوابات جمع کروائیں گے مگر جواب جمع نہیں ہوئے۔ جیل میں بھی ایف آئی اے کی تحقیقاتی ٹیم شہباز شریف سے تفتیش کے لیے گئی مگر تسلی بخش جواب نہیں دیے گئے، اس لیے اب وہ 22 جون کو تحقیقاتی ٹیم کے سامنے پیش ہوکر ان سوالات کے جواب دیں۔