مسلم ممالک سے روابط بڑھانے کا مشن۔۔ وزیرخارجہ شاہ محمود قریشی کا دورہ عراق مکمل

وزیراعظم عمران خان کے وژن کے مطابق پاکستان کے مسلم ممالک سے روابط بڑھانے کا مشن کامیابی سے جاری ہے، وزیرخارجہ شاہ محمود قریشی تین روزہ دورہ عراق مکمل کر کے واپس وطن روانہ ہوگئے۔

وزیرخارجہ مخدوم شاہ محمود قریشی عراقی ہم منصب کی دعوت پر تین روزہ دورہ عراق مکمل کر کے واپس وطن روانہ ہو گئے، بغداد انٹرنیشنل ایئرپورٹ پر پاکستان میں تعینات عراقی سفیرحامد لفطہ، عراق کیلئے پاکستان کے نامزد سفیر احمد امجد علی اور عراقی وزارت خارجہ کے سینئرحکام نے انہیں الوداع کیا۔

وزیرخارجہنے اس مختصر دورہ عراق کے دوران عراقی ہم منصب فواد حسین کے ساتھ ملاقات کی جس کے بعد دونوں وزرائے خارجہ نے مشترکہ پریس کانفرنس سے خطاب کیا، مخدوم شاہ محمود قریشی نے عراقی صدر برہام صالح اور وزیراعظم مصطفیٰ الکاظمی کے ساتھ ملاقات کی اور دوطرفہ تعلقات کے استحکام کیلئے پاکستانی قیادت کے عزم سے آگاہ کیا۔

وزیرخارجہ مخدوم شاہ محمود قریشی عراقی وزیرداخلہ، وزیردفاع اورگورنر کربلا سے بھی ملے، ان  ملاقاتوں کے دوران تعلیم،صحت، توانائی، انفراسٹرکچر کے شعبوں میں دو طرفہ سیاسی مشاورتی میکنزم کی تشکیل سمیت، دوطرفہ تعاون بڑھانے کی ضرورت پر زور دیا۔ انہوں نے عراقی قیادت کو ہرسال زیارات کیلئے عراق آنے والے دو لاکھ سے زائد پاکستانی زائرین کی مشکلات کے ازالے اور انہیں ممکنہ سہولیات کی فراہمی کیلئے وزیراعظم عمران خان کے اقدامات بالخصوص “زائرین مینجمنٹ پالیسی”سے آگاہ کیا۔

عراقی قیادت کے ساتھ دو طرفہ تجارتی، اقتصادی، سیاسی و دفاعی تعاون بڑھانے کے حوالے سے بھی بات چیت ہوئی، ان دو طرفہ ملاقاتوں میں مقبوضہ جموں و کشمیر ،فلسطین اور خطے میں امن و امان کی مجموعی صورتحال پر  تفصیلی تبادلہ خیال ہوا، وزیرخارجہ نے بغداد، نجف اور کربلا میں زیارات مقدسہ پر حاضری کا شرف حاصل کیا اور اتحاد امہ، پاکستان کی سلامتی، خوشحالی اور کرونا وبا سمیت آفات و بلیات سے خلاصی کیلئے خصوصی دعائیں مانگیں۔

 وزیرخارجہ مخدوم شاہ محمود قریشی کا یہ دورہ عراق وزیراعظم عمران خان کے وژن کی روشنی میں مسلم ممالک کے ساتھ اعلیٰ سطح کے روابط کے فروغ کی ایک کڑی ہے، توقع ہے کہ وزیرخارجہ کے اس دورہ عراق سے دونوں ممالک کے درمیان دو طرفہ تعلقات مزید مستحکم ہوں گے۔