کشمیر پر بھارتی آل پارٹیز کانفرنس ناٹک تھا نتیجہ کچھ نہیں نکلا، شاہ محمود قریشی

وزیر خارجہ شاہ محمود قریشی کا کہنا ہے کہ مسئلہ کشمیر عوام کی امنگوں کے مطابق حل ہوگا، گزشتہ روز کی نشست ایک ناٹک تھا، جس کا نتیجہ کچھ نہیں نکلا، نریندر مودی کی شخصیت پر بھی سوالات اٹھے، کل جماعتی حریت کانفرنس نے ہمیشہ حق خودارادیت کی بات کی۔

وزیر خارجہ شاہ محمود قریشی نے اسلام آباد میں میڈیا سے گفتگو کرتے ہوئے کہا کہ کل دلی میں ایک بیٹھک ہوئی، 14 کشمیری رہنماؤں کو مدعو کیا گیا، ساڑھے 3 گھنٹے کے اجلاس کا کوئی طے شدہ ایجنڈا نہیں تھا، حریت کانفرنس کو دعوت دی گئی نہ وہ وہاں موجود تھے، آل پارٹیز حریت کانفرنس کا موقف کسی سے ڈھکا چھپا نہیں، یہ ہمیشہ سے مسئلہ کشمیر کا حل اقوام متحدہ کی قراردادوں کے مطابق چاہتی ہیں۔

شاہ محمود قریشی کا کہنا تھا کہ مقبوضہ کشمیر پر جبر سے بھارت کی ساکھ متاثر ہوئی، مودی سرکار نے اپنا امیج بہتر بنانے کیلئے کل کا اجلاس بلایا، حالات نارمل ہونے کا تاثر یکسر مسترد ہوگیا، کشمیری رہنماؤں نے 5 اگست کے اقدامات واپس لینے کا کہا، 5 اگست کے اقدامات واپس لینے سے ہی کشمیر کے حالات نارمل ہوسکتے ہیں، کشمیری پراپرٹی رائٹس کا تحفظ چاہتے ہیں۔

وزیر خارجہ نے مزید کہا کہ بھارتی وزیراعظم نے اعتراف کیا کہ 5 اگست کے اقدامات سے کشمیری ناراض ہیں، بھارتی وزیراعظم کیساتھ کشمیری قیادت کی ملاقات بے نتیجہ رہی، کشمیری تحفظ چاہتےہیں ،جغرافیائی تبدیلی قبول نہیں کر رہے، مسئلہ کشمیر عوام کی امنگوں کے مطابق حل ہونا چاہیئے، پاکستان جوہری پروگرام سے متعلق پالیسی میں تبدیلی نہیں کر رہا، کون نہیں چاہے گا ایک نیوکلیئر فری دنیا ہو۔

انہوں نے کہا کہ افغانستان میں اقوام متحدہ کی فوج کی تعینیاتی کے پروگرام کے بارے میں کوئی علم نہیں ہے جبکہ ترک فوج کی کابل ایئر پورٹ کی سیکورٹی کی ذمہ داری سنھبالنے سے متعلق کچھ بھی کہنا قبل از وقت ہے، پاکستان کی نیوکلئیر پالیسی میں کوئی تبدیلی نہیں آئے گی ہمار ا ایٹمی پروگرا م اپنے دفاع کیلئے ہے ، کشمیر کی ڈیموگرافی کا معاملہ ہر فورم پر اٹھایا ہے۔

دریں اثناء پاکستانی امریکی کونسل کے ارکان ،سٹی میئر اور ڈپٹی میئر سمیت منتخب پاکستانی امریکیوں سے آن لائن خطاب کرتے ہوئے وزیر خارجہ نے رواں سال ریکارڈ ترسیلات زر بھیجنے پر بیرون ملک مقیم پاکستانیوں کی تعریف کی اور کہا کہ امریکہ میں مقیم پاکستانی وزیر اعظم عمران خان کے دل کے بہت قریب ہیں۔انہوں نے امریکہ میں مقیم پاکستانیوں کو کرونا کے چیلنجز کے باوجود وبائی صورتحال سے موثر حکمت عملی کے ذریعے نمٹنے اور معاشی میدان میں حکومت کی کامیابیوں سے آگاہ کیا۔

وزیرخارجہ نے کہا کہ موجودہ حکومت اپنی خارجہ پالیسی کا رْخ خطے کی سیاست سے خطے کی معیشت کی طرف موڑ رہی ہے۔شاہ محمودقریشی نے منتخب پاکستانی امریکیوں پر زور دیا کہ وہ پاکستان اور امریکہ کے دوطرفہ تعلقات کو مزید مستحکم بنانے کیلئے اپنا کردار ادا کریں۔