سیاسی اختلافات بھلا کر ملک کے لیے سوچیں، مریم نواز کی سیاست دانوں سے اپیل

وزیراعلیٰ پنجاب مریم نواز نے معرکہ حق مانومنٹ پارک کے افتتاح کے موقع پر اپنے خطاب میں کہا کہ ملکی دفاع کے لیے جانیں قربان کرنے والے شہداء کو سلام ہے اور ان کے اہلِ خانہ ہمارے ماتھے کا جھومر ہیں۔ انہوں نے کہا کہ رواں سال جشنِ آزادی کا جذبہ معرکہ حق کی وجہ سے مزید بڑھ گیا ہے اور آج کا دن افواجِ پاکستان کے نام ہے، جنہوں نے دشمن کو منہ توڑ جواب دے کر قوم کا سر فخر سے بلند کیا۔

بھارت کے خلاف تاریخی کامیابی

مریم نواز نے کہا کہ بھارت کے خلاف تاریخی کامیابی نے دنیا کے نقشے پر ایک نیا پاکستان ابھارا ہے۔ انہوں نے اعلان کیا کہ اب غربت اور فتنہ و فساد کے خلاف جنگ ہوگی اور ہم یہ جنگ ضرور جیتیں گے۔ ان کے مطابق پاکستان کو معاشی طور پر بھی مضبوط بنایا جائے گا تاکہ ہر میدان میں ملک کو کامیابی ملے۔

افواجِ پاکستان اور قیادت کو خراجِ تحسین

وزیراعلیٰ پنجاب نے ملکی خود مختاری اور دفاع کے لیے قوم کے اتحاد پر زور دیتے ہوئے کہا کہ ہم سب سیسہ پلائی دیوار ہیں۔ انہوں نے فیلڈ مارشل سید عاصم منیر کی جرات مندانہ قیادت کو خراجِ تحسین پیش کیا اور کہا کہ ان کی لیڈرشپ میں پاکستان ایسی کامیابی سے ہمکنار ہوا کہ دنیا دیکھتی رہ گئی۔ مریم نواز کے مطابق دنیا ابھی تک سوچ رہی ہے کہ پاکستان نے کس طرح رافیل طیارے مار گرائے۔

ایمان اور اتحاد کی طاقت

اپنے خطاب میں مریم نواز نے کہا کہ جنگ جیتنے کے لیے صرف ہتھیار نہیں بلکہ ایمان جیسا جذبہ ضروری ہے۔ انہوں نے ایئرچیف اور پاک فضائیہ کے شاہینوں کو سلام پیش کرتے ہوئے کہا کہ ہمارے سپاہیوں نے ایک جان ہو کر دشمن کے خلاف سیسہ پلائی دیوار قائم کی اور پاکستان کو تاریخی فتح دلوائی۔

سیاست دانوں کے لیے پیغام

مریم نواز نے سیاست دانوں سے اپیل کی کہ سیاسی اختلافات کو بھلا کر ملک کا سوچیں۔ ان کے مطابق اگر پاکستانی قوم اس جنگ میں تقسیم ہوتی تو کبھی یہ کامیابی نہ ملتی۔ انہوں نے عزم کیا کہ اپنے وطن کو عظیم سے عظیم تر بنانے میں کوئی کسر نہیں چھوڑی جائے گی۔