سابق سینیٹر اعجاز چوہدری کا 9 مئی کیسز میں سزا معطلی کے لیے لاہور ہائیکورٹ سے رجوع

پاکستان تحریک انصاف کے رہنما اور سابق سینیٹر اعجاز چوہدری نے 9 مئی کے مقدمات میں سنائی گئی سزاؤں کی معطلی کے لیے لاہور ہائیکورٹ سے رجوع کر لیا ہے۔ ان کی جانب سے معروف قانون دان ایڈووکیٹ میاں علی اشفاق نے سزا معطلی کی درخواستیں دائر کیں۔

مقدمات کی تفصیل

درخواست میں مؤقف اپنایا گیا کہ 9 مئی واقعات سے متعلق تھانہ سرور روڈ اور تھانہ شادمان میں درج مقدمات میں انسدادِ دہشت گردی کی خصوصی عدالت نے اعجاز چوہدری کو سزا سنائی تھی۔ مؤقف کے مطابق وہ کیس کے آغاز سے ہی گرفتار ہیں اور اس وقت تک مسلسل جیل میں قید ہیں۔

سزا کے خلاف اپیلیں

وکیل میاں علی اشفاق نے مؤقف اختیار کیا کہ اعجاز چوہدری کی سزا کے خلاف اپیلیں پہلے ہی لاہور ہائیکورٹ میں زیرِ سماعت ہیں۔ ان کا کہنا تھا کہ ٹرائل کورٹ نے حقائق کے برعکس فیصلہ سنایا اور ان کے مؤکل کو سیاسی انتقامی کارروائی کا نشانہ بنایا گیا۔

عدالت سے استدعا

درخواست میں عدالت سے استدعا کی گئی ہے کہ اپیلوں پر فیصلے تک اعجاز چوہدری کی سزا کو معطل کرتے ہوئے ان کی ضمانت منظور کی جائے اور رہائی کا حکم دیا جائے۔