پاکستان میں توہین مذہب کے جرم میں چار افراد کو سزائے موت

پاکستان کی ایک عدالت نے ہفتہ کے روز توہین مذہب کے جرم میں چار افراد کو سزائے موت اور 46 لاکھ روپے جرمانے کی سزا سنائی ہے۔

راولپنڈی میں مقامی عدالت کے جج طارق ایوب نے فیصلہ سناتے ہوئے کہا کہ ملزمان نے سوشل میڈیا پر اسلام کی چار اہم شخصیات اور قرآن پاک کی توہین کی تھی۔ جج نے اپنے فیصلے میں کہا کہ یہ ایک ناقابل معافی جرم ہے اور اس میں کسی رعایت کی گنجائش نہیں۔

ملزمان کے وکیل منظور رحمانی نے عدالتی فیصلے کو تنقید کا نشانہ بناتے ہوئے کہا کہ عدالتی کارروائی میں شواہد کی کمی کا خیال نہیں رکھا گیا۔ ان کا کہنا تھا کہ وہ اس فیصلے کے خلاف ہائیکورٹ میں اپیل دائر کریں گے تاکہ اپنے مؤکلین کو انصاف دلایا جا سکے۔

فیصلے کے بعد چاروں افراد کو جیل بھیج دیا گیا ہے، تاہم انہیں اعلیٰ عدالتوں میں اپیل کرنے کا حق حاصل ہے۔