سینئر سیاستدان میاں اظہر کی نمازِ جنازہ ادا کر دی گئی، سیاسی و سماجی شخصیات کی بڑی تعداد میں شرکت

لاہور:
سینئر سیاستدان، سابق گورنر پنجاب اور حالیہ رکن قومی اسمبلی میاں محمد اظہر کی نمازِ جنازہ قذافی اسٹیڈیم لاہور کے باہر ادا کر دی گئی۔ نمازِ جنازہ جامعہ اشرفیہ کے شیخ الحدیث پروفیسر مولانا محمد یوسف نے پڑھائی۔

نماز جنازہ میں سابق وزیر خارجہ خورشید محمود قصوری، صوبائی وزیر فیصل کھوکھر، پی ٹی آئی رہنما میاں حماد اظہر، فواد چوہدری، اعجاز شفیع، جمشید اقبال، اراکین قومی و صوبائی اسمبلی، چیئرمین دنیا میڈیا گروپ میاں عامر محمود سمیت سیاسی، سماجی شخصیات، عزیز و اقارب، اور شہریوں نے بڑی تعداد میں شرکت کی۔

صدر مسلم لیگ (ن) میاں محمد نواز شریف اور وزیراعظم میاں شہباز شریف نے میاں اظہر کے انتقال پر افسوس کا اظہار کرتے ہوئے اہلِ خانہ سے دلی ہمدردی کی۔ نواز شریف کا کہنا تھا کہ “مرحوم کے والد کا میرے والد میاں شریف مرحوم کے ساتھ دیرینہ تعلق تھا، اللہ رب العزت میاں اظہر کی مغفرت فرمائے۔”

وزیراعلیٰ پنجاب مریم نواز شریف، وزیر دفاع خواجہ محمد آصف، گورنر پنجاب اور دیگر سیاسی رہنماؤں نے بھی تعزیت کا اظہار کیا۔ سینئر وزیر مریم اورنگزیب مرحوم کے گھر گئیں اور اہلِ خانہ سے تعزیت کی۔

سیاسی خدمات کا جائزہ

میاں محمد اظہر نے بطور کارکن اپنے سیاسی کیریئر کا آغاز کیا۔ وہ 1987 میں لاہور کے میئر بنے اور پھر 1990 سے 1993 تک گورنر پنجاب کے منصب پر فائز رہے۔ وہ ابتدا میں مسلم لیگ ن کے رہنما رہے، تاہم بعد ازاں پاکستان مسلم لیگ ق میں شامل ہو گئے۔
سن 2011 میں انہوں نے پاکستان تحریک انصاف میں شمولیت اختیار کی اور فروری 2024 کے عام انتخابات میں NA-129 لاہور سے رکن قومی اسمبلی منتخب ہوئے۔