گلگت بلتستان: گلیشیئر پھٹنے سے متاثرہ غذر کے مکین خیمہ بستی منتقل، چرواہے اور ریسکیو کارکن کیلئے انعامات کا اعلان

گلگت بلتستان حکومت نے کہا ہے کہ ضلع غذر کے علاقے تالی داس میں گلیشیئر پھٹنے سے متاثرہ مکینوں کو محفوظ مقامات پر منتقل کر کے خیمہ بستی میں رہائش دی گئی ہے۔ صوبائی حکومت کے ترجمان فیض اللہ فراق کے مطابق وزیراعلیٰ گلگت بلتستان نے متاثرہ علاقے کا دورہ کیا، متاثرین سے ملاقات کی اور امدادی سرگرمیوں کا جائزہ لیا۔ وزیراعلیٰ نے متاثرہ مقام پر پانی، بجلی اور رابطہ سڑکوں کی بحالی ہنگامی بنیادوں پر یقینی بنانے کی ہدایت دی ہے۔

چرواہے اور ریسکیو کارکن کو انعامات
ترجمان کے مطابق اس سانحے کی بروقت اطلاع دینے والے چرواہے کی بدولت سیکڑوں انسانی جانیں بچ گئیں۔ وزیراعلیٰ نے چرواہے کو نقد انعام اور سرٹیفکیٹ دینے کا اعلان کیا ہے، جبکہ اسے وزیراعلیٰ سیکرٹریٹ بلا کر ایک تقریب میں اعزاز سے نوازا جائے گا۔ اسی طرح گزشتہ دنوں غذر دائن میں شاندار ریسکیو کرنے والے نوجوان کو بھی انعام دیا جائے گا۔

متبادل گاؤں اور انفراسٹرکچر کی تعمیر
صوبائی حکومت نے اعلان کیا ہے کہ غذر تالی داس کے متاثرین کے لیے مستقل بنیادوں پر ایک متبادل گاؤں قائم کیا جائے گا، اس سلسلے میں وزیر اعظم سے بات چیت کی جائے گی۔ دائن کے علاقے میں آر سی سی پل کی تعمیر کے لیے بھی ہنگامی اقدامات کیے جائیں گے۔ ترجمان نے کہا کہ امید ہے وفاقی حکومت متاثرین کے لیے متبادل گاؤں اور پل کی تعمیر میں صوبائی حکومت کا ساتھ دے گی۔

ارلی وارننگ سسٹم کی کمی اور چرواہے کا کردار
ترجمان نے اعتراف کیا کہ ضلع غذر میں ارلی وارننگ سسٹم فعال نہیں ہے، تاہم چرواہے کی بروقت اطلاع نے بڑے سانحے کو ٹال دیا۔ انہوں نے کہا کہ یہ مثال اس بات کی عکاس ہے کہ عوامی شراکت داری اور بروقت ردعمل آفات سے نمٹنے میں کلیدی کردار ادا کرتے ہیں۔