برف باری کے دوران گلگت بلتستان میں سب سے ہنگامہ خیز انتخابات کے لیے ووٹنگ کا عمل جاری

گلگت بلتستان اسمبلی کی 24 عام نشستوں کے لیے 4 خواتین سمیت 330 اُمیدوار انتخابات میں حصہ لے رہے ہیں تاہم ایک حلقے میں انتخابات ملتوی ہوگئے ہیں۔

گلگت بلتستان کے شہری اپنا حق رائے دہی استعمال کرنے کے لیے کورونا وبا سے بچاؤ کے پیش نظر فیس ماسک پہنے اور سماجی فاصلہ برقرار رکھتے ہوئے پولنگ اسٹیشنز کے سامنے قطاروں میں کھڑے نظر آئے۔تمام 23 حلقوں میں پولنگ کا عمل بلا رکاوٹ جاری ہے جبکہ گلگت شہر میں خواتین اور بزرگوں کی بھی بڑی تعداد ووٹ دینے نکلی تاہم غذر، سوست، بلتستان کے حلقوں میں شدید برف باری کے باعث لوگ گھروں میں رہنے پر مجبور ہوگئے جس سے ٹرن آؤٹ کم رہنے کا امکان ہے۔

کچھ پولنگ اسٹیشنز پر بجلی کے تعطل کی بھی اطلاعات موصول ہوئی جس کے سبب ووٹنگ کا عمل سست روی کا شکار ہوا ور عملے نے ووٹرز کے اندراج کے لیے ٹارچوں کا استعمال کیا۔گلگت بلتستان حکومت کی جانب سے پولنگ عملے کے لیے فیس ماسک، دستانوں اور سینٹائزر پر مشتمل 8 ہزار بیگز بھی فراہم کیے گئے ہیں۔

ریڈیو پاکستان کی رپورٹ کے مطابق ووٹنگ کا عمل بغیر کسی تعطل کے صبح 8 سے شام 5 بجے تک جاری رہے گا مزید یہ کہ گلگت بلتستان، پنجاب،خیبرپختونخوا، سندھ اور بلوچستان سے تعلق رکھنے والے 15 ہزار سیکیورٹی اہلکاروں کو تعینات کیا گیا ہے۔انتخابات کے موقع پر ایک ہزار 141 پولنگ اسٹیشنز میں سے 297 کو حساس قرار دیا گیا تھا۔